Hargaysa (Dawan)- Guddoomiyaha gobolka Selal, Axmed Naasir Maxamed Xaashi iyo taliyaha qaybta Booliska Gobolka Selal Gaashaanle dhexe Muuse Xasan Riiraash, ayaa,caddeeyay in 10 xildhibaan oo ka tirsan golaha deegaanka degmada Saylac in ay iskood u xidhan yihiin isla markaana aanay ka dawlad ahaan iyagu haysan oo ay fasax ka yihiin laakiin ay diideen in ay iyagoo xor ah in ay guryahoodii tagaan.
Waxaanay labada masuul intaa ku dareen in ay sugayaan wefti ballaadhan oo ka socda wasaaradda arrimaha Gudaha Somaliland oo khilaafka xildhibaannada xallintiisa u tegaya Saylac oo ka dhashay koox mudaneyaal ah oo sheegay inay xilkii ka qaaday Maayarka Magaaladaas Xuseen Iidle, isla markaana ay doorteen Maayar cusub oo xukuumaddu sharci darro ku tilmaantay.
“Xildhibaannadaasi iyaga ayaa yidhi halkaasaanu joogaynaa ama halkii nagala soo kaxeeyay ayaan ku noqonaynaa annaguna ma haysano xildhibaannadaas,maanta oo Jimce ah (shalay) waanu ku noqonay oo waxaannu ku nidhi guryihiinnii iska taga,wixii ay ka dacwoonayaana nidaamkeeda sharci u mara arrintuna maaha mid xukuumaddu dhayalsatay waxaa soo socda wefti culus oo hawshan gali doona,”ayuu yidhi Guddoomiyaha Gobolka Selal.
Taliyaha qaybta booliskaoo oo isna ka hadlay ayaa sheegay in ay dhankooda diyaariyanaan wixii faldambiyeed ah ee goobta ka dhacay cid kastaaba ha geysatee, waxaannu intaa ku ladhay in aanay xildhubaannadu booliska u xidhnayn.waxaannu yidhi; “Markii xildhibaanadaasi fadhi ay yeesheen ay kaga cawdeen in wasaaradda arrimaha guduhu u iman wayday oo ansixintii ka raagtay,waxaanay xildhibaannadaasi hor fadhiisteen xafiiskii golaha deegaanka ee degmada Saylac. waxa lagu amray in ay ka tagaan xafiiska hortiisa markii ay diideenna waxa lagu xidhay saldhigga dhexe ee magaalada Saylac.
waxaana wasaaradda arimaha guduhu amartay in la sii daayo hase yeeshee iyaga ayaa diiday in ay saldhigga ka baxaan waxaanay sheegeen in ay halkaa joogayaan wakhtina may cayimin annaguna boolis ahaan waanu diyaar sanaynaynaa galdacwadeed ahaan wixii meeshaa ka dhacay cid kastaaba dambiga ha yeelatee.wax gacan ah oo loola tegayna ma jirto xildhibaanadaas.”
Dawannews Hargeysa office