Hargaysa (Dawan)- Guddoomiyaha xisbiga mucaaradka ah ee UCID Eng. Faysal Cali Waraabe, ayaa xukuumadda talada haysa ku taageeray mawqif kii ay ka qaadatay go’doominta ay waddamada Sucuudiga iyo khaliijka carabtu ku soo rogeen dawladda Qadar.Waxaannu ku eedeeyay xisbiga Waddani in ay isku mawqif ka noqdeen dawladda Xamar cilaaqaadka ay dawlado badani u jareen Qadar, maadaama oo ay dawladda Soomaaliya sheegtay in ay dhex ka tahay, halka xisbiga Waddani-na uu Soomaaliya la saftay.
Eng. Faysal Cali Waraabe, waxa uu tilmaamay in ay noqonayso markii u horaysay oo xisbi Somaliland ka mid ah axsaabta siyaasadda ay isku mawqif noqdaan dawlada Soomaaliya. Waxaanu yidhi “Xukuumaddu (Somaliland) waxay taageertay xulafada Sucuudiga. Markii ay wadamo is-qab-sadaan aad xidhiidh leedihiin, waxaa la eegaa sida aad xidhiidhka u leedihiin, oo macaamilo u leedihiin.
Dadkeenuna way ka shaqaynayeen markii la aasaasay Sucuudiga, waxaana jira shirkadda ugu wayn ee shiidaalka soo saarta Sucuudiga dadkii u horeeyay ee ka shaqeeyay Somaliland ayay ka soo jeedeen, waxaana jirta in 5000 qof oo Sucuudiga jooga. Imaaraadka carabtu waa wadanka maalgashanaya wadankeena ee saldhiga ka samaystay dalkeena, markaa marka ay is qabsadaan saaxiibkaa iyo inaadeerkii saaxiibkaa ayaad raacaysaa. Xukuumadda Somaliland waan ku hambalyaynaynaa mawqifkaa ay iska taagtay arrintaasi, waana mawqif fiican, waana siyaasad fiican oo ku dhiirasho leh”. “Waan ka xumahay in xisbigii Waddani ay isku mawqif noqdeen dawladda Soomaaliya, waana markii u horraysay ee xisbi Somaliland ah ay isku mawqif noqdaan dawladda Soomaaliya ee been beenta ah, ee aan jirin, ee la haysto, ee la leeyahay waa dawlad,” ayuu yidhi guddoomiyaha UCID. Geesta kale Faysal Cali Warrabe, ayaa ku hambalyeeyay wasaarada caafimaadka sidii ay u xakamaysay shuban-biyoodkii ka dilaacay magaalada Burco iyo degaamo ka tirsan gobolka Togdheer.
Dawannews Hargeysa office