Hargeysa (Dawan)- Golaha Dhaqanka Oromada Itoobiya oo socdaal ku yimid dalka iyo madaxdhaqameedka Somaliland ayaa shir ay ku yeesheen Huteelka Ambassador ee caasimadda Hargeysa, waxay soo saareen war-saxaafadeed wadajir ah oo ay kaga hadleen xoojinta cilaaqaadka labada ummadood iyo sidii loo sii adkeyn lahaa xidhiidhka labada dal.
Warsaxafadeedkan oo ay ku saxeexnaayeen madaxa Gole Dhaqameedka Oromada, Bayana Sanbato iyo Suldaan Aadan Faarax oo metalayey madax-dhaqameedka Somaliland, waxa uu u qornaa sidan:-
“Golaha Dhaqanka ee Oromada ayaa 15kii bishan booqasho ku yimid magaalada Hargeysa ee caasimadda Somaliland, oo ay kaga jawaabeen martiqaad ay ka heleen madaxda dhaqanka Somaliland si loo unko xidhiidh wanaagsan oo ay yeeshaan dadka labada dal ee Somaliland iyo Itoobiya.
Golaha Dhaqanka ee Oromadu waxay kulamo kala duwan la yeesheen qaybaha kala duwan ee bulshada Somaliland oo ay ka mid ahaayeen Golaha Guurtidda, madaxda dhaqanka iyo ururrada bulshada Somaliland, waxaanay ka wadahadleen arrimo ay ka mid ahaayeen Nabadgelyada, ammaanka Mandaqada, Dhaqaalaha, isku gudubka Ganacsiga iyo dhaqanka.
Golaha Dhaqanka Oromada iyo Madax dhaqameedka Somaliland oo 17-kii Bishan shir ku yeeshay Huteelka Ambassador ee magaalada Hargeysa, waxay falanqeyn kadib isla qaateen qoddobadan:
- Aasaaska isdhexgalka dhinaca dhaqanka iyo shirarku waxay u wanaagsan tahay hagaajinta xidhiidhka labada ummadood.
- Labada dhinac waxay isku raaceen in dalalka Somaliland iyo Itoobiya ay jiraan waxyaabo ay ka siman yihiin oo u baahan inay si wadajir ah ula tacaalaan, sida Saboolnimada, Tahriibinta dadka iyo nabadgelyo darrada gobolka.
- Madaxda dhaqanka ee Somaliland iyo Itoobiya waxay ku heshiiyeen in la xoojiyo isla markaana la fududeeyo xidhiidhka soo jireenka ah ee dhinaca Ganacsiga.
4 Waxa kaleo o ay isku afgarteen in kor loo qaado xidhiidhkii jiray ee u dhexeeyey labada dawladood ee Somaliland iyo Itoobiya.
- Madaxda dhaqanka Somaliland waxay u soo jeediyeen Golaha Dhaqanka Oromada iyo dawladda Itoobiya inay ka shaqeeyaan sidii ay u soo afjari lahaayeen colaadda u dhexaysa qowmiyadaha Soomaalida iyo Oromada ee gudaha Itoobiya.
6. Gole dhaqameedka Oromadu waxay ballanqaadeen in shirka kan xiga ee labada madax dhaqameed ay ku qaban doonan Itoobiya.”
Dawannews Hargeysa office