Hargaysa(Dawan):-Xildhibaan Maxamed Cali Xirsi Obama oo ka tirsan mudaneyaasha golaha wakiiladda ee xisbi xaakimka Somaliland ee Kulmiye ugu jira golaha,ayaa sheegay in dhaliil kasta oo golaha wakiiladu ay leeyihiin ay wadagaan sadexda xisbi qaran ee Somaliland oo goluhu uu ka kooban yahay.
Waxaanu intaa ku daray in golaha wakiiladdu in ay duuduub wax ku ansixiyaan oo aan laga doodin in ay ahayd waxyaabihii uu golaha ku soo kordhiyay guddoomiyihii hore ee golaha wakiiladda Somaliland ahna guddoomiyaha xisbiga mucaaridka ah ee WADDANI Cabdiraxmaan Maxamed Cabdilaahi Cirro.
Xildhibaanka oo ugu horrayn ka hadlaya is bedelka miisaaniyad sannadeedyadii Somaliland,ayaa yidhi “Miisaaniyadda Somaliland markii aanu nimid Golaha Wakiilada sanadkii 2005 iyo imika oo lagu jiro Sanaddka 2019 ka farqi wayn ayaa u dhaxeeya miisaaniyadda horumar badan ayaan ka gaadhnay wax badani way innaga dhiman yihiin maanta 300 milyan oo doolar ayay maraysaa.”
Xildhibaanku waxa uu sheegay in duuduub wax ku ansixinta golaha wakiilada uu bilaabay guddoomiyajha waddani Cirro oo muddo badan golaha wakiiladda guddoomiye u soo ahaa.
Waxaanu intaa raaciyay in dhaliil kasta oo golaha wakiiladu ay leeyihiin ay qayb ka yihiin xisbiyada mucaaridku .
“Xisbiga Waddani labo iyo toban sano ayuu xukumayay Golaha Wakiilada in duuduub wax lagu ansixiyo Guddoomiyaha xisbiga Waddani ayaa bilaabay,xisbiyaduna way nala leeyihiin dhaliilaha Golaha Wakiiladu dhaliilo wuu leeyahay.xisbiyada mucaaradku way nala leeyihiin waayo saddexda xisbi ayaa kuraasida golaha fadhiya 25 xildhibaan ayuu xisbiga Waddani ku leeyahay GolahaWakiilada.”.
Waxaa kale oo uu iftiimyay sida mashaariicda horumarineed ee dalku ugu wada caddahay miisaaniyadda qaranka isla markaana loogu wada siman yahay“Mashruucii ugu waynaa ee dalka laga fuliyay waxa weeyaan wadadaa isku xidha Burco iyo Ceerigaabo mashruuc ka wayn oo Somaliland laga fuliyay majirto, Misaaniyaddu ma gobolaysna waxa Hargaysa ugu jira ayaa ugu jira Boorama Burco Ceerigaabo Lascaanood oo Berbera ugu jirta Wasaarada Beeraha misaaniyadda waxa ugu jira milyan 700 kun oo doolar ayaa ugu jirta sidaa dateed ayay shaqadedii u korodhay wasaarada maaliyadda,”.
Dawannews Hargeysa office