Hargaysa (Dawan):- Gudida Qandarasyada Qaranka Somaliland, ayaa shaaciyay qandaraas lagu guulaystay isla markaana ku dhawaaqay mid kale oo loo tartamayo.
Guddida Qandaraasyada Qaranka ayaa soo bandhigay shirkadda ku guulaysatay Qandaraaska Mashruuca qaboojiyeyaasha magaalada Berbera ee ay Wasaarada Xanaanada Xoolaha Somaliland ka hirgalinayso magaaladaas.
Xubnaha gudida Qandaraasyada oo shalay si wada jira shir jaraaid ugu qabtay xarunta gudida Qandaraasyada ee magaalada Hargaysa ayaa waxa ay baahiyeen shirkadda ku guulaysatay qandaraaska Qaboojiyaha kalluunta magaalada Berbera waxaanay baahiyeen Qandaraaska hubinta sannadlaha ah ee gaadiidka dalka.
Guddoomiyaha Gudida Qandaraasyada Qaranka Nuux Maxamed Xuseen ayaa sheegay shirkadda ku guulaysatay qandaraaska qaboojiyaha Kalluunka laga samaynayo magaalada Berbera.waxaanu yidhi“Qandaraaskan waxa ku tartamay laba shirkadood oo kala ah Sam mandhikaal iyo Dhoollayare, waxaana ku guulaysatay shirkadda Dhoolayare oo ku guulaystay qandaraaskaa Qaboojiyaha laga hirgalinayo magaalada Berbera,waxaanu kaga helay wuu ka qiimo jabnaaday tallaagadihii Dhoollayare dalka ayay yaalaan halka uu Sam mindhikaal uu sheegay in uu dibedda kasoo iibinayo labadaa qodobba waa lagaga helay,”.
Agaasimaha Gudida Qandaraasyada Qaranka Maxamed Axmed Jabarti oo isaguna halkaa ka hadlay ayaa sheegay in ay baahinyaan qandaraaska hubinta sannadlaha ah ee gaadiidka Somaliland.waxaanu yidhi“Gudida Qandaraasyada qaranku waxa uu baahinayaa hubinta sannadlaha ah ee gaadiidka dalka Somaliland gobolka maroodijeex laba geerash gobolka togdheer hal geerash gobolka awdal Boorama hal geerash sool hal geerash Sanaag hal geerash Saaxil hal geerash,qandaraaskaa aanu maanta (shalay) baahinayno wuu furan yahay waxaanu xidhmayaa 31 bisha saddexaad,”.
Waxaa kale isna halkaa ka hadlay Agaasimaha guud ee Wasaarada Gaadiidka iyo Horumarinta jidadka Cumar Sayid,waxaanu sheegay in ay daraasad ay sameeyeen ay ku ogaadeen waxyaabaha ugu badan ee sababa shilalka gaadiidka,waxaanu yidhi “Daraasad ayaanu samaynay ku sahabsan waxan shilalka keena waxaana noo soo baxday in saddex shay keenaan shilalka baabuurta Somaliland dirawal xumo waddo xumo iyo gaadiid xumo gaadhi aanu in dhihiisu shidmaynin sidee buu u mari karaa waddada iyo gaadhiga biriigu aanu shaqaynayn.”
Dawannews Hargeysa office