Qore:Khadar.M.Dhako.
Hargaysa(Dawan):-Guddoomiyaha Golaha Wakiilada Somaliland Baashe Maxamed Faarax ayaa sheegay in Madaxweynaha Somaliland Muuse Biixi Cabdi uu usoo gudbiyay Golaha Wakiilada Toddobada xubnood ee Komishanka Doorashooyinka.
Baashe Maxamed Faarax oo shalay u waramayay Warbaahinta ayaa intaa ku daray in Golaha Wakiiladu waajibaadkiisa Dastuuriga ah ka gudan doonaan Xubnaha Komishanka Doorashooyinka ee loo soo gudbiyay,
Baashe Maxamed Faarax oo Arimahaasi ka hadlayayna waxa uu yidhi“Toddobadii Xubnood Komishanka Doorashooyinka Qaranka waa la soo gudbiyay Golaha Wakiilada ayaanay hor yaallaan waajibaadkiisa Dastuuriga ah ayaanu ka gudan doonaa Golaha Wakiiladu,waxaana loo gudbin doonaa Xubnaha Komishanka Doorashooyinka Gudida Arimaha Gudaha ee Golaha Wakiilada markaa Golaha ayay ku soo celin doonaan ka dibna waajibaadkiisa Dastuuriga ah ayuu ka gudan doonaa Golaha Wakiilada,”.
Baashe Maxamed Faarax ayaa waxa uu sheegay in Xisbiga WADDANI usoo gudbiyay qoraal uu ku hakinayo xubintoodii Komishanka Doorashooyinka ee loo soo gudbiyay.waxaanu yidhi“Waxaa na soo gaadhay Waraaq uu soo qoray Xisbiga WADDANI oo uu ku hakinayo xubintiisii Komishanka Doorashooyinka waxaanay ka cabanayaan Xubnaha Komishanka Doorashooyinka ee la soo gudbiyay cabashana ayaanay muujiyeen labo xubnood,”.
Sidoo kale Baashe Maxamed Faarax ayaa waxa wax laga waydiiyay cabasho Xildhibaano ka tirsan Golaha Wakiilada ka muujiyeen Safaarada Turkey ee Somaliland.waxana uu ku jawaabay oo uu yidhi“Cabashadaasi way jirtaa oo waa laga wada cabanayay Safaarada Turkey Golaha Wakiiladu xidhiidh toos ah lama la laha Safaaradaha dalka,waxaanan cabashadaas u gudbinaynaa Wasaarada Arimaha Dibada Wasiirka Arimaha Dibada ayaana u dhaxeeya dalka iyo Safaradaha,”.