Harimacad kale ayaa ku dhintay beer lagu nasto oo ku taal gobolka Madhya Pradesh ee dalka Hindiya, taas oo tirada shabeelada dhimatay ka dhigaysa toddobo, laba bilood gudahood.
Beerta Qaranka ee Kuno ayaa sheegtay in Haramcadka labka ah, oo lagu magacaabi jiray Tajas, la helay isaga oo dhaawac ah uuna u dhintay dagaal uu galay.
Haramcadka ayaa lagu dhawaaqay in uu ka dabar-go’ay Hindiya sannadkii 1952-kii, balse waxa dib loo soo celiyay sannadkii hore, taas oo qayb ka ah qorshe hammi ah oo lagu doonayo in dib loogu soo celiyo noolahaasi.
Ilaaliyeyaasha qaarkood ayaa su’aal ka keenaya ku habboonaanta deegaanka Kuno.
Sideed Haramcad ayaa laga soo raray Namibia oo la geeyay Hindiya bishii Sebtembar ee sannadkii hore, halka 12 ka mid ah laga keenay Koonfur Afrika bishii Febraayo 2023.
Saddex ka mid ah Haramcad ayaa dhintay labadii bilood ee la soo dhaafay. Saddex kale oo dhal, oo uu dhalay Haramcad laga keenay Namibia oo ku dhashay Kuno bishii Maarso, ayaa sidoo kale dhintay bishii May .
Carruurta dhalata ayaa la ogaaday inay daciif yihiin, miisaankoodu hooseeyo aadna u fuuqbaxaan. Maamulka beerta ayaa sheegay in Haramcadka waaweyn ay u dhinteen sababo kala duwan oo ay ka mid yihiin kelyaha oo gabaabsi ah iyo dhaawacyo ka soo gaadhay dhexdooda marka ay orgoonayaan ama isa saaranayaan.
Qorshe hawleedka dib u soo celinta haramcadka ee Hindiya oo la daabacay bishii January ee sannadkii hore, ayaa sheegaysa in Kuno uu leeyahay “goobo ku habboon noloshooda isla markaana leh waxay ugaadhsadaan oo ku filan”.
Laakiin tan iyo dhimashadooda, beerta waa la baadhayaa, iyada oo qaar ka mid ah ilaaliyaasha ay su’aal ka qabaan in beerta ay leedahay ugaadh ku filan. Waxa kale oo jira walaac laga qabo in xayawaannada kale ay khatar weyn u yihiin shabeelada.
Saynis yahanada ka shaqaynaya mashruuca ayaa sidoo kale hore ugu adkaystay in la filayo in dhimasho waxanay qorshe hawleedkoodu sheegaya in heerka dhimashada boqolkiiba 50% sanadka ugu horeeya ee mashruuca loo qaadan doono guul.
Dib u soo celinta Haramcadka ee Hindiya ayaa waxaa bilaabay Ra’iisul Wasaare Narendra Modi iyadoo ay dadku aad u xiiseeyaan, iyada oo khubaro badan oo duur joogta ah ay soo dhaweeyeen tallaabadan.
Bishii May, Maxkamadda Sare waxay walaac ka muujisay dhimashada xoolaha waxayna waydiisatay dawladda federaalka inay laga fiirsado in meel kale loo wareejiyo.
Herimcadku waxay ku leeyihiin Hindiya qiimo astaan weyn maadaama ay qayb ka yihiin sheeko-xariiro badan.
Laakiin sidoo kale waa naasleyda kaliya ee weyn ee dabar go’a tan iyo markii ay xornimada qaateen 1947 sababta oo ah ugaadhsiga, degaannada oo yaraada iyo ugaadh la’aanta.