Ururka Xamaas ayaa sii daayay laba la hayste oo Maraykan ah, kuwaasi oo la afduubtay intii uu socday weerarkii khasaaraha badan dhaliyay ee kooxda Falastiiniyiinta ay ku qaadeen Israa’iil bishan.
Israa’iil waxay xaqiijisay inay hooyo Judith iyo gabadheeda Natalie Raanan ku qaabileen Xamaas xuduudka Gaza.
Labadan qof waxaa lagu sii daayay “sababo bini’aadantinimo”, Xamaas ayaa tidhi.
Madaxweynaha Maraykanka Joe Biden ayaa sheegay inuu aad ugu faraxsan yahay sii dayntooda, wuxuuna xaqiijiyey inuu khadka taleefoonka kula hadlay Raanans.
Waxay ahaayeen maxaabiistii ugu horreysay ee la sii daayo tan iyo markii ay dableyda weerartay Israa’iil 7-dii Oktoobar, oo ay ku dileen 1,400 oo qof ku dhawaad 200 oo la haystayaal ah.
Saraakiisha Falastiiniyiinta ayaa sheegay in in ka badan 4,000 oo qof lagu dilay Gaza, oo ay Israa’iil duqeymo ku hayso.
Sarreeye Guuto Gal Hirsch, oo ay weheliyaan xubno ka tirsan Ciidanka Difaaca Israel (IDF), ayaa labada labadan qof ee Xamaas sii daysay ku qaabilay soohdinta falastiiniyiinta fiidnimadii Jimcaha, sida uu sheegay xafiiska ra’iisal wasaaraha Israa’iil.
Raana waxaa la geeyey xero ciidan oo ku taal badhtamaha dalka, halkaas oo ay ku sugayeen xubnaha qoyska, sida uu sheegay xafiiska Ra’iisul Wasaaraha.
Hooyada iyo gabadheeda ayaa ku sugnaa Kibbutz Nahal Oz oo ku taal koonfurta Israel markii la afduubay intii ay socdeen duulaanka Xamaas.
Hooyadan oo ka soo jeeda gobolka Illinois ee Maraykanka waa 59 jir gabadheeduna waa 17 jir ah, oo dhawaan ayey ka qalin jabisay dugsiga sare, labooduba waxay degan yihiin Evanston, Illinois, oo ku taal duleedka Chicago.
Natalie walaalkeed, Ben Raanan, ayaa BBC-da u sheegay inuu dareemay “dareen aad u weyn oo ay ugu mahadcelinayaan bulshada ballaadhan ee adduunka oo dhan oo walaashey ka dhigay safka hore ee fikirradooda, ducooyinkooda, dhammaan diimaha iyo dhammaan caqiidadooda. ”
Natalie adeerkeed, Avi Zamir, ayaa sheegay in qoysku ay “aad u faraxsan yihiin”.
Evanston Rabbi Meir Hecht ayaa BBC-da u sheegay in bulshada Yuhuudda ah ee ku nool xaafadda ay “faraxsan yihiin”, isaga oo intaa ku daray in taleefankiisu uu si joogto ah u soo dhacayay tan iyo markii la sii daayay.
“Waxaan aad ugu mahadcelineynaa Ilaaha Qaadirka ah mucjisadan,” ayuu yidhi Rabbi Hecht, isaga oo intaa ku daray: “Weli xanuun qoto dheer ayaan ku qabnaa dhammaan la haystayaashaas weli halkaas ku jira.”
Mr Biden ayaa uga mahad celiyay dowladda Qatar dadaalka dhex dhexaadinta ah ee ay ku bixisay sii deynta labada haween Jimcihii.
Saraakiisha Maraykanka ayaa ” habeen iyo maalinba ka shaqeynayay sidii ay u soo deyn lahaayeen muwaadiniinta Maraykanka ah ee ay Xamaas qafaasheen”, ayuu yidhi.
Afhayeen u hadlay Xamaas oo lagu magacaabo Abu Cubeyda ayaa sheegay in hooyada iyo gabadheeda la sii daayay “sababo bini’aadantinimo darteed, iyo in dadka Maraykanka iyo caalamkaba loo caddeeyo in sheegashada Biden iyo maamulkiisa Faashiistaha ay tahay mid been abuur ah oo aan sal iyo raad toona lahayn”.
CNN ayaa sheegtay in hooyadan ay soo wajahday xaalad caafimaad darro, isla markaana ay daweyn ka heli jirtay hay’adda Laanqeyrta Cas.
Judith Raanan waxa ay ku dhalatay Israel, waxaanay Maraykanka u tagtay shaqo la xidhiidha bilicda Maqaarka iyo tababar caaafimaadka, waxaanay inta badan adeegsan jirtay magaceeda Hebrew ama Cimraaniga ka soo jeeda oo ah Yehudit, sida ay sheegtay Chicago Tribune.
Maraykanka iyo UK ayaa mid waliba sheegay inay Qatar kala shaqeynayaan sidii ay gacan uga geysan lahaayeen soo deynta muwaadiniintooda.
Wasaaradda arrimaha dibadda Qatar ayaa bayaan ay soo saartay ku tidhi: “Waan sii wadi doonnaa wadahadalka aan la leenahay Israa’iil iyo Xamaas, waxaana rajeyneynaa in dadaalladaas ay horseedi doonaan in la sii daayo dhammaan la haystayaasha rayidka ah ee dhalasho kasta.”
Wadamada kale ee muwaadiniinta lagu haysto Gaza waxaa ka mid ah Argentina, Germany, France, Thailand iyo Portugal.