Israa’iil ayaa sheegtay in ay qaaday weerar dhulka ah oo xaddidan oo ka dhan ah bartilmaameedyada Xisbullah ee Lubnaan. Milatariga Israa’iil ayaa sheegay in howlgalka uu ahaa mid xaddidan, waxaana lagu taageeray duqeymo iyo madaafiic.
War saxaafadeedkeeda ayaa lagu sheegay in ay Israa’iil Xisbullah ku beegsatay “tuulooyinka u dhow xadka” Israa’iil.
Mid ka mid ah duqeymaha ayaa lagu soo warramayaa in lagu garaacay xero weyn oo ay ku nool yihiin dad Falastiiniyiin ah taas oo u dhow Sidon oo ku taalla koonfurta Lubnaan.
Hawgalkan ayaa ku soo beegmaya iyadoo Wasiirka difaaca Israa’iil uu shalay wacad ku maray in ciidankoodu ay qaadi doonaan duulaan dhulka ah oo ay ku qaadaan koonfurta Lubnaan. Waxa uu sheegay in ciidamada ku sugan xuduuda ay isticmaali doonaan xoog oo dhanka cirka, dhulka iyo badda si ay ugu oggolaadaan dadka Israa’iil ee barakacay inay ku laabtaan guryahoodii.
Balse dhanka kale waxaa ka jawaab ceiyay Ku xigeenka hogaamiyaha Xisbullah kaas oo sheegay in dagaalyahanada kooxdu ay diyaar u yihiin inay ka hortagaan duulaanka Israa’iil. Khudbaddiisii ugu horreysay ee xubin sare oo ka tirsan Xisbullah tan iyo markii la dilay hogaamiyahooda Jimcihii, Naciim Qasem wuxuu sheegay in Xisbullah ay u diyaar-garowday duulaan dhulka ah oo dhanka Israa’iil kaga yimaadaa.
Ra’iisul wasaaraha Lubnaan ayaa isna ku dhawaaqay in ciidamada dalkaasi ay sidoo kale diyaar u yihiin inay difaacdaan aagga xadka haddii loo baahdo.
Dhanka kale Xoghayaha Difaaca Mareykanka, Lloyd Austin, ayaa dhiggiisa Israa’iil Yoav Gallant, ku taageeray, ujeeddooyinka duulaanka dhulka ee Lubnaan. Waaxda difaaca Mareykanka ayaa sheegtay in labada nin ay ku heshiiyeen baahida loo qabo in la burburiyo kaabayaasha weerarka ee xuduuda Israa’iil iyo Lubnaan.
Waxay intaas ku dartay in ujeeddadu ay tahay in la hubiyo in Xisbullah aanay qaadi karin weerarro qaabeysan oo ka dhaca waqooyiga kuwaas oo la mid ah kuwii 7-dii October ay Xamaas ku qaadday Israa’iil.
Bayaankeeda ayaa lagu sheegay in Lloyd uu carrabka ku adkeeyay inay jiri doonto wax uu ugu yeeray cawaaqib xumada Iran hadii ay qaado weerar militari oo toos ah oo ka dhan ah Israa’iil.
Sidoo kale waxa uu sheegay in loo baahan yahay in la gaadho qaraar diblumaasiyadeed si loo xaqiijiyo in dadka rayidka ah ay si nabad ah ugu soo laabtaan guryahoodii ku yaalay labada dhinac ee xadka.
Hadalkiisa la xidhiidha Iran ayaa imanaya iyadoo ay Iran sheegtay in weerarrada Israa’iil ee Lubnaan iyo dhulka Falastiiniyiinta aanay noqon doonin mid jawaab la’aan ah.
Afhayeen u hadlay Wasaaradda Arrimaha Dibadda, Naasir Kanani ayaa u sheegay wariyeyaasha Tehraan in Iran aanay doonayn dagaal, balse aanay ka waaban doonin in ay u dhaqaaqdo difaaceeda nafteeda iyo danaheeda. Mar sii horreysay, duqeymo xagga cirka ah ayaa ka dhacay xaafad ku taal koonfurta Beirut, ka dib markii militariga Israa’iil ay uga digeen dadka ku dhaqan halkaasi inay isaga guuraan.
Milateriga Israa’iil ayaa dhinaca kale sheegay in 35 gantaal laga soo riday Lubnaan oo ku dhacay waqooyiga Israa’iil saaka – qaarkood waa la qabtay, qaarna waxay ku dhaceen meelo bannaan. Waa sida ay hadalka u dhigeenne.
Israa’iil waxay dharbaaxo isdaba joog ah ku dhufutay Hezbollah labadii toddobaad ee la soo dhaafay, laakiin duulaanka dhulka ee sidan oo kale ah waa nooc ka duwan dagaal, oo khataro cusub ku ah ciidamada Israa’iil iyo xasilloonida gobolka, iyo sidoo kale Lubnaan lafteeda, ayay yidhi Lucy Williamson oo BBC-da uga soo warranta Waqooyiga Israa’iil.