Hargeysa(Dawan)-Professor Ter Majok oo macallin sare ka ah Jaamacadda Juba ee dalka koonfurta Suudaan, ayaa sheegay in heshiiska isfaham ee wada galeen Somaliland iyo Itoobiya ay labada dhinac ka faa’iidi doonaan fursado dhaqaale oo waxtar u yeesha mandaqada Geeska Afrika.
Prof. Ter Majok wuxuu sidaasi ku sheegay waraysi uu siiyay warbaahinta dawladda Itoobiya, oo ay soo xigatay wakaaladda wararka Somaliland (SOLNA), waxaanu tilmaamay in heshiiska is afgarad (MoU)-gu uu ahmiyad u leeyahay Itoobiya oo uu xusay in dhaqaalaheeda xawliga u koraya darteed ay u baahan tahay kaddin baddeed.
Waxa kaloo khabiirku sheegay in dhinaca siyaasadda heshiiskaasi faa’iido badan u yeellanayo Somaliland iyo Itoobiyaba. Waxaanu xusay inuu horseedi doono isku-xidh ganacsi oo dhex mara labada shacab.
Mr. Ter Majok wuxuu bayaamiyay inuu aaminsan yahay in heshiiskani isdhexgal dhaqaale iyo fursado shaqo abuur u yeellan doono dalal kale oo ka baxsan labada dawladood ee heshiiska wada galay.