Ugu yaraan 12 qof ayaa ku dhintay tobanaan kalena way ku dhaawacmeen guud ahaan dalka Ukraine kadib weerarro habeenimo ah oo ay fuliyeen diyaaradaha aan duuliyaha lahayn iyo gantaalaha Ruushka, sida ay sheegeen saraakiisha gobolka iyo kooxaha gurmadka degdega ah.
Saddex carruur ah ayaa lagu dilay Zhytomyr, galbeedka Kyiv, nin 70 jir ah ayaa lagu dilay koonfurta magaalada Mykolaiv, waaxda gurmadka degdegga ah ee gobolka ayaa sidaa sheegtay. Waxay ku soo beegantay maalin kadib markii caasimadda Ukraine ay la kulantay mid ka mid ah weerarradii ugu cuslaa tan iyo markii uu bilowday duulaanka Ruushka.
Weeraradii Sabtidii, oo ay ku dhinteen 13 qof guud ahaan Ukraine, ayaa ku soo beegmaya iyada oo ay socdaan dadaallo diblomaasiyadeed oo lagu soo afjarayo dagaalka isla markaana maxaabiis la isweydaarsaday, balse Ruushka ayaa iska dhega tiray baaqyada xabbad joojinta. Madaxweynaha Ruushka Vladimir Putin ayaa duulaan buuxa ku qaaday Ukraine bishii Febraayo 2022, Moscow ayaana hadda gacanta ku haysa qiyaastii 20% dhulka Ukraine.
Tan waxaa ku jira Crimea – Jasiiradda koonfureed ee Ukraine oo uu Ruushka la wareegay 2014-kii. Ciidamada cirka ee Ukraine ayaa sheegay in ay soo rideen 45 gantaal oo nooca Cruise-ka ah ayna baabi’iyeen 266 diyaaradood oo aan duuliyaha lahayn tan iyo Sabtidii. Waxa la sheegay in inta badan gobollada Ukraine ay saameeyeen weerarradii habeen hore.
War qoraal ah oo uu soo dhigay Facebook ayuu madaxa gobolka Khmelnytskyi Serhiy Tyurin ku sheegay in afar qof la dilay shan kalena la dhaawacay. “Lix guri oo gaar loo leeyahay iyo 20 kale ayaa burburay,” ayuu raaciyay. Waaxda gurmadka degdega ah ee Ukraine DSNS ayaa sheegtay in afar qof lagu dilay 16 kalena lagu dhaawacay oo ay ku jiraan saddex carruur ah gobolka Kyiv.
Madaxa gobolka Kyiv Mykola Kalashnyk ayaa baraha bulshada soo dhigay sawiro muujinaya dhowr guri oo gubtay kadib weeraradii Ruushka. Magaalada caasimadda ah ee Kyiv, mas’uuliyiinta maxalliga ah ayaa sheegay in 11 dhaawac ah, dab badan iyo burbur soo gaadhay dhismayaal la deggan yahay oo ay ku jiraan qol jiif.
Boqolaal qof ayaa la arkayay iyaga oo gabaad ka dhiganaya saldhigyada dhulka hoostiisa ee tareenada magaaladu maraan. Waxay ku soo beegantay iyada oo caasimadu ay u dabaal-degayso fasaxa sannadlaha ah ee Kyiv Day Axaddii.
Magaalada Zhytomyr, DSNS waxay sheegtay in saddex carruur ah oo da’doodu tahay siddeed, 12 iyo 17 la dilay, 10 qofna waa la dhaawacay, guryaha gaarka loo leeyahayna ay “burbureen oo waxyeello gaarsiiyeen”. DSNS ayaa sheegtay in meydka nin oday ah laga soo saaray dhismo shan dabaq ah oo ay ku dhufatay diyaarad Drone ah oo ku taal Mykolaiv. Shan qof oo kale ayaa ku dhaawacmay.
Kharkiv, maamulka gobolka ayaa sheegay in saddex dhaawac ah. Dhanka Ruushka, wasaaradda gaashaandhigga ayaa sheegtay in diyaaradaha aan duuliyaha lahayn ee Ukraine ay beegsadeen siddeed gobol oo Ruushku leeyahay.
“Laga soo bilaabo 20:00 wakhtiga Moscow (17:00 GMT) ee 24-ka May ilaa 00:00 May 25, cutubyo ka tirsan difaaca hawada oo heegan ku jiray ayaa burburiyay oo qabtay 95 diyaaradood oo aan duuliye lahayn oo Yukreeniyaan ah,” ayay wasaaraddu ku tidhi hadal ay soo saartay.
Duqa magaalada Moscow Sergei Sobyanin ayaa sheegay in 12 diyaaradood oo kuwa aan duuliyaha lahayn ah oo ku sii jeeday caasimadda la soo riday. Weeraradan ayaa yimid iyada oo Ruushka iyo Ukraine ay ka qeyb qaadanayaan is dhaafsiga maxaabiista kadib wadahadal labada dhinac ku dhexmaray Turkiga.
Jimcihii, Ukraine iyo Ruushka ayaa mid walba ku wareejiyay 390 askari iyo rayid ah maxaabiistii ugu waynayd ee la isweydaarsado tan iyo markii Ruushku bilaabay weerarradiisa buuxa bishii Febraayo 2022. Sabtidii, madaxweynaha Ukraine Volodymyr Zelensky ayaa ku dhawaaqay in 307 kale oo maxaabiis Ukraine ah ay ku soo laabteen dalkooda, taas oo qayb ka ahayd heshiis isdhaafsi ah oo lala galay Kremlin.
Labada dal ayaa ku heshiiyey in la is dhaafsado maxaabiis dhan1,000 maxbuus dalkiiba, waxaana la filayaa in maalmaha soo socda kuwa kale la is dhaafsado. Isdhaafsigan ayaa daba socda wadahadaladii u horeeyay ee fool ka fool ah oo ay labada dhinac yeeshaan muddo saddex sano ah, kaasoo ka dhacay dalka Turkiga.
Horaantii todobaadkan, madaxweynaha Maraykanka Donald Trump iyo Putin waxay wadahadleen laba saacadood oo taleefoon ah si ay uga wadahadlaan heshiis xabbad-joojin ah oo uu Maraykanku soo jeediyay Ukraine. Trump ayaa sheegay in uu rumeysan yahay in baaqaasi uu si wanaagsan u dhacay, wuxuuna intaa ku daray in Ruushka iyo Ukraine ay si degdeg ah u billaabi doonaan wadahadallada ku aaddan xabbad joojinta iyo “joojinta dagaalka”.