Hargeysa (Dawan)- Wasaaradda Waxbarashada iyo Sayniska Jamhuuriyadda Somaliland ayaa bilowday olole kormeer, kaas oo si habsami ah dalka oo dhan uga socda, si loo hubiyo daacadnimada, hufnaanta iyo habsami u socodka imtixaannada shahaadiga qaranka.
Wasiirka Waxbarashada Waxbarashada Prof. Ismaaciil Ducaale Yuusuf oo hoggaaminaya masuuliyiinta Wasaaradda iyo Guddoomiyaha Gobolka Gebiley Maxamed Cabdillaahi Bookh, ayaa kormeer dhammaystiran ku sameeyay xarumaha ay ka socdaan imtixaannada ee gobolka Gebiley. Weftigu waxa ay qiimeeyeen heerka u hoggaansanaanta xeerarka iyo habsami u socodka imtixaannada, iyaga oo qorshaynaya in ay kormeerkooda maalmaha soo socda gaadhsiiyaan gobollada Awdal iyo Salel.
Sida lagu baahiyey wargeyska The Horn Tribune shalay, Agaasimaha Guud Wasaaradda Waxbarashada Mr. Cabdiraxman Xuseen Xirsi ayaa hoggaamiyey kormeero ka dhacay gobolka Saraar, isaga oo ay weheliyaan Guddoomiyaha gobolka Saraar Md. Axmed Cabdilahi Maxamed iyo Guddoomiyaha Waxbarashada Gobolka Cabdikariin Mr. Saciid Cawad, ayaa booqday xarumaha imtixaannada muhiimka ah ee magaalooyinka Wadamago, Caynaba, iyo Oog, iyaga oo xaqiijinaya dabaqaada hufnaanta imtixaanaadka qaranka.
Weftiga Agaasimaha Guud waxuu uga sii gudbi doonaan hawlahooda kormeerka imtixaanaadka Gobolka Sanaag.
Sidoo kale, Wefti uu hoggaaminayo Wasiiru-Dawlaha Waxbarashada Md. Maxamed Yuusuf Ibraahim ayaa socdaalo la xidhiidha kormeerka habsami-u-socodka imtixaannada ku tegaya Gobollada Saaxil iyo Oodweyne, iyaga oo xoojinaya ballanqaadka wasaaradda ee hufnaanta iyo caddaaladda.
“Tallaabadani waxa ay hoosta ka xariiqaysaa u heellanaantayada ilaalinta heerarka ugu sarreeya ee daacadnimada imtixaannada iyo kor u qaadista tayada waxbarashada Somaliland oo dhan,” ayuu ku yidhi Wasiirka Waxbarashada Prof Ismaacil bayaan uu soo saaray.
Tallaabooyinka firfircoon ee wasaaradda ayaa ujeeddadoodu tahay in la hubiyo hufnaanta iyo hannaanka caddaaladeed ee Imtixaanka, iyada oo qiimayn lagu samaynay aaminaadda iyo caddaaladda dhammaan ardayda.
Kormeerrada ayaa imanaya iyada oo in ka badan 40 kun oo arday ay dalka oo dhan kaga qayb galayaan imtixaannada shahaadiga dugsiyada dhexe iyo Sare, kuwaas oo tiir muhiim u ah nidaamka waxbarashada Somaliland. Dedaallada wasaaradda ayaa si weyn loogu ammaanay in ay kor u qaadeen kalsoonida dadweynaha ee heerarka tacliinta qaranka.