Hargeysa (Dawan)- Madaxweyne ku-xigeenka Jamhuuriyadda Somaliland, ahna ku-simaha Madaxweynaha Mudane Maxamed Cali Aw Cabdi ayaa shalay Qasriga Madaxtooyada ku qaabilay wefti heer sare ah oo ka socday Ururka Ganacsatada waddanka aynu saaxiibka nahay ee Taiwan (Taiwan Business Association).
Madaxweyne ku-xigeenka waxa kulanka ku wehelinayey Wasiirka Wasaaradda Horumarinta Maalgashiga iyo Warshadaha Jamhuuriyadda Somaliland Mudane Saciid Maxamed Buraale oo soo qaban-qaabiyey kulanka.
Wasiirka oo kulanka hadal ka jeediyey ayaa waxa uu sheegay in wasaaraddu ay tahay irridda ay ka soo galaan cid kasta oo u socota in ay Somaliland maalgashato. Wasiirku waxa uu sheegay in shuruucdii iyo siyaasadihii Maalgashiga ay Wasaaraddu si aqoon sare leh ay u diyaarisay, si loo soo jiito loona hanto kalsoonida Maalgashadayaasha shisheeye. Wasiirku waxa uu Madaxweyne ku-xigeenka JSL u sheegay in Wasaaraddu ay Weftigan tusi doonto fursadaha maalgashi ee ka jira dalkeena.
Madaxweyne-ku-xigeenku waxa uu Ururka Ganacsatada reer Taiwan uga mahad naqay booqashada ay ku yimaadeen Somaliland, waxaanu soo dhaweeyey iskaashiga sii kordhaya ee u dhexeeya Somaliland iyo Taiwan.
Madaxweyne ku-xigeenka JSL waxa uu hoosta ka xarriiqay sida ay Dawladda Somaliland uga go’an tahay abuurista jawi xasiloon oo dhiirri gelinaya maalgashadayaasha, isaga oo tilmaamay faa’iidada uu iskaashigu u leeyahay labada dhinac, gaar ahaan fursadaha maalgashi ee yaalla Somaliland, gaar ahaan xagga Xoolaha, Kalluumaysiga, Beeraha, Macdanta, Tignoolajiyada, Ganacsiga, iyo kaabayaasha dhaqaalaha.
Iyagana dhinacooda, wefdiga maalgashatada Taiwan oo ay hor kacaysay Guddoomiyaha Ururka Ganacsatada dalka Taiwan (Taiwan Business Association) Marwo Alyne Chen, iyada oo ku hadlaysay afka weftiga, waxa ay Madaxweyne ku-xigeenka iyo Wasaaradda Horrumarrinta Maalgashiga uga mahad naqday soo dhawaynta diirran, waxana ay sheegtay in ay diyaar u yihiin in laga wada faa’idaysto fursadaha ballaadhan ee maalgashi ee ka jira gudaha Jamhuuriyadda Somaliland.
Guddoomiyaha Ururka Ganacsatada dalka Taiwan waxa ay sheegtay in ay aad u xiisaynayaan qaybaha Malgashiga ee kala ah:
- Kaluumaysiga iyo khayraadka badda
- Sifaynta biyaha,
- Caafimaadka xoolaha,
- Maalgelinta ganacsiyada yaryar,
- Wax-soo-saarka iyo suuq-geynta qalabka Electronic-ga
Shirkadaha ay ka koobnaayeen Ururka Ganacsatada dalka Taiwan (Taiwan Business Association) ayaa kala ahaa:
- YEN & BROTHERS ENTERPRISE CO., LTD,
- AQUAPONICS COMPANY,
- ZTQ ENTERTAINMENT,
- HW CAPITAL,
- CENTRAL SKY INTERNATIONAL TRADING CO,
- EXCELSIOR BIO-SYSTEM INCORPORATION
Guntii iyo gabagabadii, labada dhinac waxa ay muujiyeen danaynta ay u qabaan ballaadhinta xidhiidhka dhaqaale, ganacsi iyo xoojinta iskaashiga dhinacyada badan leh ee u dhexeeya labada dal ee Jamhuuriyadda Somaliland iyo Taiwan.