Abaaruhu waa mid ka mid ah masiibooyinka dabiiciga ah ee soo noqnoqda, taas oo muddooyinkii u dambeeyay si weyn u saamaysay deegaannada miyiga ah ee Somaliland, gaar ahaan gobollada ku tiirsan xoolaha nool iyo beer roobaadka. Hoos-u-dhaca roobabka, kulaylka sii kordhaya iyo isbeddelka cimilada ayaa sababay biyo-yaraan iyo le’ashada xoolaha nool, taas oo si toos ah u taabatay nolosha kumannaan qoys.
Abaaruhu maaha arrin ku cusub mandaqadda Geeska Afrika; balse saamaynta iyo culayskooda ayaa sii kordhaya sanadba sannadka ka dambeeya, iyadoo isbeddelka cimiladuna door muuqda ka ciyaarayo. Somaliland, oo inta badan ku tiirsan dhaqaale ahaan wax-soo-saarka xoolaha iyo beeraha, ayaa ka mid ah meelaha sida gaarka ah ugu nugul abaaraha iyo dhibaatooyinka ka dhasha isbeddelka cimilada.
Sidaa darteed, gurmadka abaaraha Somaliland waa waajib qaran oo u baahan iskaashi buuxa oo dhex mara dowladda, ganacsatada, qurba-joogta iyo hay’adaha samafalka. Waxa kale oo lama huraan ah in la sameeyo qiimayn joogto ah oo lagu ogaanayo baaxadda dhibaatada, iyo dejinta si la isugu dubbarido gurmadka iyo gargaarka la gaadhsiinayo bulshada ku tabaaleysan.
In kasta oo ay jiraan dedaallo xoogan oo ay wadaan Guddida Gurmadka Abaaraha, kuwaas oo qaaday tallaabooyin wax ku ool ah sida: biyo-dhaamin la gaadhsiiyay deegaannada ugu daran, dayactirka ceelasha iyo berkadaha, isku xidhka hay’adaha caalamiga ah iyo kuwa maxalliga ah, iyo wacyigelin ku saabsan kaydinta biyaha iyo calafka xoolaha, haddana hawsha gurmadku waa mid ka baaxad weyn awoodda guddida keliya.
Waxaa loo baahan yahay wadajir iyo iskaashi qaran oo ballaadhan si loo xaqiijiyo gurmadka samato-bixinta abaaruhu uu gaadho nolosha iyo mustaqbalka bulshada ee ku tabaaleysan xaaladaha adag. Si kastaba ha ahaatee, gurmadka samato-bixinta nolosha dadkeena dhibaataysani maaha kaliya waajib saaran dowladda; balse waa masuuliyad wadajir ah oo saaran muwaadin kasta oo reer Somaliland ah.
Ugu dambeyn, midnimada iyo isku duubnida oo mar walba ahayd tiir ay Somaliland ku caan baxday, ayaa maantana loo baahan baahan yahay in ficil lagu muujiyo, waana waqtigii dhammaan bulshada Somaliland door firfircoon ka qaadan lahaayeen taageerada walaalahooda tabaaleysan, si loo xaqiijiyo midnimo iyo iskaashi dhab ah.
