Pakistan ayaa weeraro dhowr jeer oo habeenimo ah ka geysatay Afghanistan, taas oo Taliban ay sheegtay inay ku dhinteen tiro dad ah, kuna dhaawacneen tobanaan qof, oo ay ku jiraan haween iyo carruur.
Islamabad waxay sheegtay in weerarradan ay bartilmaameedsadeen toddobo xero oo la sheegay inay ku jiraan maleeshiyaad iyo meelo ay ku dhuumanayaan oo u dhow xadka Pakistan iyo Afghanistan, waxaana la bilaabay ka dib markii dhawaan qaraxyo ismiidaamin ah ay ka dhaceen Pakistan.
Afgaanistaan ayaa cambaareysay weerarrada, iyada oo sheegtay inay bartilmaameedsadeen guryo badan oo rayid ah iyo dugsiyo diimeed.
Weeraradan cusub ayaa yimid ka dib markii labada dal ay ku heshiiyeen xabad joojin aan cago adag ku taagnayn bishii Oktoobar ka dib isku dhacyo dhimasho leh oo ka dhacay xuduudaha, inkasta oo dagaallo dambe ay dhaceen.
Wasaaradda difaaca ee Taliban ayaa sheegtay in duqeymahaasi ay bartilmaameedsadeen goobaha rayidka ee gobollada Nangarhar iyo Paktika.
Mas’uuliyiinta Nangarhar ayaa BBC-da u sheegay in guriga nin lagu magacaabo Shahabuddin uu ku dhacay mid ka mid ah duqeymaha, kaas oo dilay ilaa 20 xubnood oo qoyska ka tirsan, oo ay ku jiraan haween iyo carruur.
Wasaaradda Warfaafinta iyo Baahinta ee Pakistan ayaa sheegtay inay fulisay “beegsasho sirdoon oo ku salaysan toddobo xero oo argagixiso ah iyo meelo ay ku dhuumanayeen”.
Bayaan ay soo saartay X, waxay ku sheegtay in bartilmaameedyada ay ku jiraan xubno ka tirsan Tehreek-i-Taliban Pakistan oo la mamnuucay, oo dowladdu ugu yeedho “Fitna al Khawarij,” iyo sidoo kale la-hawlgalayaasha iyo Gobolka Dowladda Islaamiga ah-Khorasan.
Wasaaraddu waxay weerarrada ku tilmaantay “jawaab celin aargudasho ah” oo ku aaddan qaraxyadii ismiidaaminta ahaa ee dhawaan ka dhacay Pakistan oo ay geysteen kooxo argagixiso ah oo ay sheegtay inay gabbaad ka dhigteen Kabul.
Weeraradii ugu dambeeyay ee ka dhacay Pakistan waxaa ka mid ahaa mid lagu qaaday masaajid Shiicada ku yaal caasimadda Islamabad horraantii bishan, iyo sidoo kale kuwo kale oo dhacay tan iyo markii bisha barakeysan ee Ramadaan ay bilaabatay toddobaadkan gobolka waqooyi-galbeed ee Khyber Pakhtunkhwa.
Pakistan ayaa ku eedeysay Taliban-ka Afgaanistaan inay ku guuldareysteen inay wax ka qabtaan xagjiriinta, waxayna intaas ku dartay inay haysato “caddayn dhammaystiran” oo muujinaysa in weerarrada ay geysteen dagaalyahannada iyaga oo raacaya tilmaamaha hoggaankooda ee Afgaanistaan.
Wasaaradda difaaca ee Taliban ayaa markii dambe ku soo qortay bogga X qoraal ay ku cambaareyneyso weerarradaas “xadgudub cad oo lagu sameeyay sharafta dhuleed ee Afghanistan”, iyada oo raacisay inay ahaayeen “xadgudub cad oo ka dhan ah sharciga caalamiga ah”.
Waxay ka digtay in “jawaab ku habboon oo la cabbiray la qaadi doono wakhti ku habboon”, iyada oo raacisay in “weerarrada lagu qaado bartilmaameedyada rayidka iyo hay’adaha diinta ay muujinayaan fashilka ciidamada Pakistan ee sirdoonka iyo amniga.”
Weerarradan ayaa imanaya maalmo ka dib markii Sacuudi Carabiya ay dhexdhexaadin ka samaysay sii deynta saddex askari oo Pakistani ah horraantii toddobaadkan, kuwaas oo lagu qabtay Kabul intii ay socdeen isku dhacyada xuduudda ee bishii Oktoobar ee la soo dhaafay.
Iskahorimaadyadaas waxay ku dhammaadeen xabad joojin degdeg ah isla bishaas ka dib dagaalkii ugu xumaa tan iyo markii Taliban ay xukunka ku soo laabatay 2021.
Bakistaan iyo Afgaanistaan waxay wadaagaan xuduud buuraley ah oo dhererkeedu yahay 1,600-mayl (2,574 km).