Hargeysa (Dawan) Mashruuca Koronto-ballaadhinta ee magaalada Borama waa horumar muhiim ah oo muujinaya sida xukuumadda Somaliland ay uga go’an tahay horumarinta kaabeyaasha tamarta iyo bixinta adeegyo koronto oo tayo leh, gaar ahaan magaalo-madaxdas gobolka Awdan ee Boorama oo laga hirgelinayo Mashruucan oo ka kooban mashaariic tamareed oo la isku hallayn karo, taas oo kordhin doonta helitaanka tamarta nadiifta ah ee magaalada Borama iyo deegaanada ku xeeran.
Waxaa xusid mudan, Madaxwayne ku-xigeenka Jamhuuriyadda Somaliland, Mudane Maxamed Cali Aw Cabdi, ayaa si rasmi ah u dhagax-dhigay Koronto-ballaadhinta Magaalada Boorama, kaas oo uu maalgeliyay Baanka Adduunka, waxaana la rajeynayaa in uu wax weyn ka beddelo dhaqaalaha iyo nolosha bulshada ee gobolka Awdal. Madaxweyne ku-xigeenka Somaliland, Mudane Maxamed Cali Aw Cabdi, ayaa si cad u sheegay in mashruucani uu gacan ka geysan doono horumarinta adeegyada tamarta, iyo kor u qaadista isticmaalka tamarta nadiifta ah ee gobolka.
Tani waxay qayb ka tahay dadaallada xooggan ee xukuumadda Somaliland ku bixiso horumarinta kaabeyaasha tamarta iyo yoolka ah in shacabku ay helaan adeegyo koronto oo jaban oo lagu kalsoonaan karo, taasoo sahleysa kobaca dhaqaale iyo horumarka bulshada. Waxay sidoo kale xoojinaysaa ilaalinta deegaanka iyadoo la taageerayo tamarta cadceedda, taas oo noqonaysa isbeddel muhiim ah ee Somaliland ku gaadhi karto mustaqbal tamar nadiif ah.
Mashruuca noocan oo kale ah waxa uu noqon doonaa mid tusaale u ah mashaariicda kale ee tamarta ee la hirgelin karo oo ka caawinaya Somaliland inay noqoto mid ka mid ah dalalka horumaray ee adeegsada tamarta cagaaran iyo tamar la isku hallayn karo.