Hargeysa (Dawan) Guddoomiyaha Hay’adda Shaqaalaha Dawladda Jamhuuriyadda Somaliland, Mudane Cabdicasiis Xirsi Warsame, iyo wefti uu hoggaaminayo ayaa shalay safar shaqo ku tagay magaalada Boorama kaas oo la xidhiidha kormeer shaqo oo muhiim ah. Socdaalkan ayaa ujeedkiisu tahay qiimaynta shaqada isu-duweyaasha gobollada iyo fahamka caqabadaha haysta, si xalal deg-deg ah loogu helo.
Mudane Cabdicasiis Xirsi Warsame ayaa sheegay in kulamada la qorsheeyay ee ay la yeelanaytaan masuuliyiinta heer gobol ay diiradda saarayaan maamul-daadejinta iyo sidii adeegyada wasaaradaha iyo hay’adaha dowladda loo gaadhsiin lahaa dhammaan bulshada gobolka. Tani waxay muujineysaa dadaal muuqda oo lagu hubinayo in nidaamka maamulka iyo adeegyada bulshada ay noqdaan kuwo hufan oo waxtar leh.
Guddoomiyaha oo faahfaahin ka bixiyey ujeeddada socdaalka ayaa sheegay “Socdaalkayaga ujeedadiisu waxay ahayd sidii aanu xog-oggaal ugu noqon lahayn shaqada ay hayaan Isu-duweyaashu, iyo caaabadaha haysta, iyo sidii xalal deg-deg ah loogga gaadhi lahaa wixii daran. “Sidoo kale, waxa aanu ka sheekaysanay arrimaha maamul daadejinta, iyo adeegyada dawladda ee ay bixiyaan Wasaaradaha iyo hay’adaha kala duwan ee dawladdu sidii dhammaan gobalka loogga wada heli lahaa”. ayuu yidhi Cabdicasiis Xirsi Warsame.
Sida uu sheegay guddoomiyuhu qorshayaasha weftiga waxaa qayb ka ah kormeer lagu sameynayo wasaaradaha iyo hay’adaha gobolka, si loo qiimeeyo adeegyada la bixiyo iyo goobaha loo qorsheeyey in laga hirgeliyo nidaamka maamul-daadejinta. Waxaanu yidhi “Sidoo kale waxa aanu kormeer ku soo samayn doonaa Wasaaradaha iyo hay’adaha kala duwan iyo adeegyada ay wadaan iyo sidoo kale goobaha maamul daadejinta laga samayn doono haddii Alle yidhaa” Tallaabooyinkan ayaa dhiirrigelinaya hufnaanta, isla xisaabtanka, iyo horumarinta tayada shaqada maamulka dowladda.