Iiraan ayaa ku baaqday in la sii daayo saddex duuliye oo ay sheegtay inay qabatay Qatar ka dib markii laba ka mid ah diyaaradaheeda dagaalka ay ku dhaceen difaac cirka intii lagu jiray hawlgal milatari oo bilaabmay dagaalkii Maraykanka iyo Iiraan.
Warqad uu u diray madaxa Guddiga Caalamiga ah ee Laanqeyrta Cas (ICRC), Brig Gen Mohammad Bagherzadeh oo ka tirsan Iiraan ayaa ku sheegay in duuliyeyaasha – Javad Salehi, Abdul Majid Dashtian iyo Imran Behroshian – la haystay muddo lix bilood ah.
Wuxuu sheegay in meydka duuliye afraad, Majid Kazemi, la soo celiyay ka dib markii lagu dilay isla hawlgalkii dhacay 2-dii Maarso 2026 – maalintii saddexaad ee dagaalka.
Qatar “si cad ayay u beenisay” sheegashada Iiraan waxayna sheegtay inay “la yaabtay hadalladan marin habaabinta ah”.
Jeneraal Bagherzadeh ayaa sheegay in saddexda duuliye ay Qatar qabatay ka dib markii ay ka soo saareen diyaaradahooda intii ay ku jireen hawlgal dagaal oo bartilmaameedsanaya saldhig milatari oo ay Qatar ku leedahay.
Warqadda uu u diray madaxa ICRC Mirjana Spoljaric, oo ay daabacday warbaahinta Iiraan, ayuu ku eedeeyay Qatar inay ku xadgudubtay “xuquuqda aan laga qaadi karin ee maxaabiistan, taas oo ka hor imaanaysa dhammaan sharciyada iyo qawaaniinta caalamiga ah”.
Warqadda ayaa sidoo kale sheegtay in saddexda duuliye aan loo ogolaan inay la kulmaan ama la xidhiidhaan qoysaskooda.
Afhayeenka arrimaha dibadda ee Qatar Majed Mohammed Al Ansari ayaa sheegay in xidhiidh lala sameeyay duuliyayaasha “ka dib markii ay ku xad gudbeen hawada Qatar”, laakiin aanay helin jawaab.
“Tallaabooyinka lagama maarmaanka ah ayaa la qaaday si loo difaaco dhulkeenna iyada oo la raacayo sharciga caalamiga ah,” ayuu ku daray hadal uu ka jeediyay X.
Al Ansari wuxuu sheegay in kooxaha raadinta iyo samatabbixinta ee Qatar “ay si buuxda u guteen waajibaadkooda iyaga oo raadinaya hadhaadiga duuliyayaasha”.
Wuxuu sheegay in Qatar ay la xidhiidhay Iiraan si ay “isku dubbarido wareejinta hadhaaga mid ka mid ah duuliyeyaasha la soo helay” iyo in Tehran aanay weli ka jawaabin martiqaad ay dib ugu eegayso faahfaahinta hawlgalka raadinta iyo samatabbixinta.