Hargeysa (Dawan) Wasiirka Wasaaradda Waxbarashada iyo Sayniska Somaliland, Prof. Ismaaciil Ducaale Yuusuf, ayaa dhallinyarada reer Somaliland ugu baaqay in aanay ku koobnaan oo keliya raadinta shaqooyinka dawladda, balse ay ka faa’iidaystaan fursadaha shaqo iyo ganacsi ee dalka jira. Baaqan dhiirigelinta ah ee Wasiirka Wasaaradda Waxbarashada iyo Sayniska Somaliland, Prof. ee ku wajahan dhallinyarada reer Somaliland, waa fariin muhiim ah oo ku soo beegmaysa xilli uu shaqo-abuurku noqday mid ka mid ah caqabadaha waaweyn ee horyaalla jiilka cusub.
Dhallinyaradu waa laf-dhabarta bulshada iyo mustaqbalka dhaqaale ee Somaliland. Sidaas darteed, mustaqbalka shaqo ee jiilka cusub ma noqon karo mid ku tiirsan oo keliya shaqooyinka ay bixiso dawladda. Waxaa loo baahan yahay in la abuuro dhaqan cusub oo ku salaysan xirfad, hal-abuur, ganacsi iyo shaqo-abuur. Wasiirku waxa uu dhallinyarada ugu baaqay in ay indhahooda ku fidiyaan hay’adaha caalamiga ah, kuwa maxalliga ah, shirkadaha ganacsiga iyo qaybta gaarka loo leeyahay. Fariintani waxay xambaarsan tahay xaqiiqo muhiim ah oo ah in fursadaha nololeed aanay ku koobnayn hal meel oo keliya.
Waxa kale oo muhiim ah in dhallinyaradu fahmaan in shaqo-abuurku ka qiimo badan yahay shaqo-doonka keliya. Qofka fikrad ganacsi la yimaadda, xirfad yeesha ama adeeg cusub abuura, wuxuu awood u yeelan karaa inuu naftiisa shaqo u abuuro, isla markaana shaqo siiyo dhallinyaro kale. Waxaa sidoo kale muhiim ah in qaybta gaarka loo leeyahay, hay’adaha maaliyadeed iyo xarumaha tababarrada xirfaduhu ay door muuqda ka qaataan arrintan. Haddii dhallinyarada la siiyo tababarro ku saabsan xirfadaha suuqa shaqadu u baahan yahay, hal-abuurka ganacsiga, tiknoolajiyadda iyo maaraynta ganacsiga, waxaa suuragal noqon karta in la yareeyo caqabadaha shaqo la’aanta.
Dhanka kale, dhallinyarada laftooda waxaa saaran masuuliyad. Waa inay ka gudbaan fikirka ah in guusha noloshu ku xidhan tahay oo keliya helitaanka shaqo rasmi ah. Qofku waa inuu noqdaa mid diyaar u ah inuu barto xirfad cusub, tijaabiyo fikrad ganacsi, raadiyo fursado cusub, kana faa’iidaysto tiknoolajiyadda iyo suuqyada soo baxaya. Ugu dambayn, fariinta ugu muhiimsan ee dhallinyarada Somaliland maanta loo baahan yahay waa in fursaddu aanay mar walba noqon shaqo la sugayo, balse ay noqon karto shaqo la abuurayo.
Dhallinyaro aqoon leh, xirfad leh, hal-abuur leh oo ku dhiirrata inay fikrado cusub hirgeliyaan waxay noqon karaan awoodda ugu weyn ee Somaliland ku gaadhi karto horumar dhaqaale oo waara. Sidaas darteed, hadalka Wasiirka Waxbarashadu wuxuu mudan yahay in laga dhigo dood qaran oo ku saabsan sidii dhallinyarada Somaliland loogu diyaarin lahaa mustaqbal aan ku dhisnayn shaqo-doon oo keliya, balse ku dhisan shaqo-abuur, hal-abuur iyo isku-filnaansho dhaqaale.