Qore Faysal Yuusuf Cali Kacaa
Waxaan si weyn u soo dhawaynayaa go’aanka Xukuumadda Somaliland ee lagu shaaciyey in la qaadanayo 1,300 shaqaale-dowladeed ah, iyadoo fursadaha shaqo loo qaybinayo gobollada, lana marayo hannaan tartan iyo daahfurnaan ku dhisan. Tallaabadani waa mid muhiim ah oo rejo weyn u abuuri karta dhalinyarada Somaliland, gaar ahaan kumannaan qof oo aqoon, karti iyo shahaadooyin haysta balse muddo ku jiray shaqo-raadin.
Waxaan si gaar ah ugu mahadcelinayaa Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro) iyo Xukuumaddiisa, dadaalka ay gelinayaan shaqo-abuurka, horumarinta hay’adaha dowladda iyo abuurista fursado ay dhalinyaradu aqoontooda ugu adeegaan dalkooda.
Shaqo-abuurku ma aha oo keliya in qof mushahar helo; waa in qofka dhalinyarada ahi helo rejada mustaqbalka, karaamada uu ku shaqeysto, iyo fursadda uu aqoontiisa ugu adeegayo dalkiisa. Waxaan rejaynayaa in tallaabadani ay noqoto bilowga barnaamijyo shaqo-abuur oo joogto ah, si loo yareeyo shaqo la’aanta Somaliland, loona kordhiyo fursadaha shaqo ee dhalinyarada, haweenka iyo dadka aqoonta leh ee dalka.
Waxaan sidoo kale ku dhiirrigelinayaa dhammaan dhalinyarada in ay ka faa’iidaystaan fursaddan, diyaariyaan dukumentiyadooda, aqoontooda iyo khibraddooda, isla markaana ku tartamaan si cadaalad, karti iyo hufnaan ku dhisan. Madaxweyne, tallaabada shaqo-abuurka ah waa tallaabo rejo gelinaysa bulshada. Mahadsanid.