Manchester City ayaa lagu soo warramayaa in Premier League ay ku heshay 114 kiis oo ka mid ah eedeymaha loo soo jeediyay kooxdas oo gaadhayay 115 kiis. kuwaas oo la xidhiidha xeerarka dhaqaalaha, kaddib baadhitaan muddo dheer socday. Arrintan ayaa dib u soo celisay dood weyn oo ku saabsan sannadihii ay Manchester City ahayd mid ka mid ah kooxaha ugu awoodda badan Premier League. Xilligaas waxaa si gaar ah ula tartamayay Liverpool, oo uu hoggaaminayay tababare Jürgen Klopp, iyadoo labada kooxood ay dhowr xilli si dhow ugu dagaallameen horyaalka.
Taageerayaasha Liverpool ayaa hadda is weydiinaya waxa ay natiijadani uga dhigan tahay tartamadii hore. Su’aalaha ugu waaweyn waxaa ka mid ah in koobab laga qaadi karo City, in natiijooyinkii hore wax laga beddeli karo, ama in kooxihii kaalmaha dambe galay loo aqoonsan karo horyaal. Si kastaba ha ahaatee, Premier League weli may shaacin cunaqabataynta kama dambaysta ah, waxaana sidoo kale jirta suurtagalnimada in Manchester City ay racfaan ka qaadato go’aan kasta oo lagu soo rogo.
Sidaas darteed, weli lama xaqiijin karo in Liverpool ama koox kale loo aqoonsan doono inay ku guuleysatay horyaallo hore oo ku dhammaaday in Liverpool ay gasho kaalinta kaalinta labaad. Arrintaas waxay ku xidhnaan doontaa go’aanka rasmiga ah ee Premier League iyo natiijada geeddi-socodka racfaanka.
Waxa hadda ugu muhiimsan ayaa ah in la sugo tallaabada xigta ee Premier League. Sida lagu sheegay warbixinta haddii cunaqabatayn la soo rogo, waxay sidoo kale saameyn ku yeelan kartaa sida loo xasuusto qaar ka mid ah xilli ciyaareedyadii hore iyo tartankii adkaa ee u dhexeeyay Manchester City iyo Liverpool. Kiiska Manchester City sidaas darteed weli ma dhammaan, waxaana indhaha lagu hayaa go’aanka Premier League, nooca ciqaabta iyo jawaabta Manchester City.