Oslo (Dawan) Shirkadda Shidaalka iyo gaaska DNO ASA ee reer Norway ayaa shaaca ka qaaday inay kordhisay muddada heshiiskii baadhista shidaalka Somaliland.
Shirkadda oo war saxaafadeed ka soo saartay Oslo 12 Sebtember 2014, waxa ay ku dhawaaqday in ay heshiiskaasi sahaminta iyo baadhista shidaalka Somaliland ay ku kordhisay laba sano oo hor leh waqtigii uu jirayay.
Shirkadda DNO ASA oo baadhitaan ka wada Block SL 18, waxa ay sheegtay in uu sii socon doono haatan waqtiga sahaminteeda koowaad ilaa bisha November 8, sanadka 2017, xilligaasi oo uu soo afjarmi doono.
DNO, ayaa lagu tilmaamay in ay leedahay qayb dhan 50% howsha sahaminta Block SL 18.
Sida warsaxaafadeedka lagu sheegay hawl wadeenada ka qaybta ahi waxa ay dhamaystireen Servey-gii sahankii goobta iyo qiimeyntii daraasadeed ee deegaanka Block 18, waxayna sheegeen in ay bilaabayaan barnaamijka u qorshaysnaa ee Seismic acquisition program, marka ugu horaysa ee ay dawladda Somaliland hawlgeliso ciidanka loogu tallogalay ilaalinta shirkadaha baadhista shidaalka (OPU), kaasi oo ay hawshiisu tahay taageerada Shirkadaha caalamiga ah ee ka hawl-gelaya Somaliland.
“Ciidankaasi OPU ayaa la filayaa inay hawlgalaan 2015,” ayaa lagu yidhi warsaxaafadeedka.
Sida oo kale, shirkadda DNO waxa ay intaa ku dartay in ay dib u bilaabayso waqtigaa barnaamij horumarin ah oo ku waajahan in ay u qodo ceel biyoodyo bulshada ku dhaqan deegaanka Block SL 18.
DNO ASA waa shirkad ka diiwaangashan Oslo, Norway ,bariga dhexe iyo waqooyiga Afrikaba, waana shirkad shidaal iyo gaas.
Shirkaddu waxa ay qayb wadaag ku leedahay sahaminta, baadhista, horumarinta iyo soo saarista 20 block oo ah heerar kala duwan ku teedsan bariga iyo baddaba sida gobolka Kurdistaan ee Ciraaq, Jamhuuriyada Yaman, Sultanate of Oman, Imaaraadka Carabta, Tunisa Republic iyo Somaliland.