“Bulshadda ku dhaqan deegaanka Dhahar oo si diirran u soo dhaweeyay talaabadda ay ciidamadda qaranku ku baacsadeen malaashiyaadka ka soo duushay Puntland”…
Dhahar,(Dawan): Ciidamadda Qaranka ee Somaliland ayaa la sheegay in ay shalay xadka ka gudubsiiyeen, isla markaana ay gaadhsiiyeen meel u dhaw magaaladda Boosaaso, Wasiirro ka socday maamul goboleedka Punt land iyo maleeshiyooyin la socday oo Sabtidii doraad ku soo xad-gudbay magaaladda Dhahar ee gobolka Sanaag.
Wararka naga soo gaadhaya deegaanka Dhahar ayaa sheegaya in ciidanka qaranka Somaliland ee ku sugan gobolka Badhan ay awood kaga saareen halkaasi xubnaha Wasiiradda ah iyo maleeshiyadda la socotay ee maamulka majeerteeniya.
Wasiiradan iyo maleeshiyaadka reer Puntland ee ay shalay jabiyeen ciidanka qaranka Somaliland ayaa la sheegay in ay isku urursadeen meel dibadda ka ah deegaanka Dhahar, iyadoo ciidamadda qarankuna ay ka war heleen dhaqdhaqaaqyadaasi ka dib-na ay ugu awood sheegteen in ay mar kale wasiirradaas iyo ciidankii ay wateen-ba ay firxadkoodii kaga soo hadheen duleedka magaaladda Boosaaso.
Ciidanka Qaranka Somaliland ee xadka dagaalka kaga saaray kooxda reer Garoowe ee soo duushay ayaa la sheegay in ay sugeen guud ahaan gacan ku haynta xuduudka Somaliland.
Xubnahan reer Puntland ee ku soo xad gudbay xuduudka Somaliland ayaa waxa ku jiray wasiirro, waxaanay hogaaminayeen ciidan maleeshiyo ah, kuwaasi oo ay ciidanka qaranka Somaliland ka tallaabiyeen ay xadka ay wadaagaan maamulka Puntland iyo dawladda Somaliland.
Kooxdan ka soo duushay dhinaca Puntland ayaa la sheegay in uu horkacayeen wasiirro uu ka mid yahay wasiirka Xanaannadda Xoolaha ee majeerteeniya, isla markaana waxa xubno ka ahaa wasiir ku-xigeenka caddaaladda iyo wasiir ku-xigeenka arrimaha gudaha ee maamulka Puntlnad.
Dhinaca kale, Bulshadda ku dhaqan deegaanka Dhahar ayaa si diirran u soo dhaweeyay talaabadaasi ay ciidamadda qaranku ku baacsadeen malaashiyaadka Puntland oo ay
Sheegeen in ay doonayeen in ay dhibaato colaadeed deegaanka ka abuuraan, waxaanay wararka deegaankaasi naga soo gaadhay sheegayaan dadweynaha deegaanka gobolka Badhan ay caddeeyeen in ay si buuxda u garab taagan yihiin ciidamadda Qaranka.
Faysal Xiis Weerar(Afgaab)
