Hargeysa (Dawan): Waxa todobaadyaddii u dambeeyay ay dalka ka dhoofeen Maraakiib xoolo badan sida, ayaa waxa magaaladda Berbera ka baxay Markabkii ugu danbeeyay oo siday xoolaha moosinka Carafo ee Xajka, kaasi oo qaaday 70,000 oo neef. Siddaasi waxa wargeyska Dawan u sheegay Cali Ibraahin Ciise (Cali Waraabe) oo ka mid ah ganacsatadda xoolaha dhoofisa, waxana uu sheegay in maadaama oo ay dhawdahay Ciidda Carafo in markabkii u dambeeyay oo xoolo qaadaya uu xalay ka baxay dekadda Berbera. “Insha Allaa waxa aanu maanta (shalay) gabogabeynaynaa xoolihii u danbeeyay loogu talogalay in Carafada loo dhoofiyo dalka Sucuudiga, waxaana taagan markii u danbeeyay oo qaadi doona 70,000 oo neef, caawa ama habeen danbe ayuu bixi doonaa” ayuu yidhi Cali Ibraahin Ciise oo ka mid ah ganacsatada waaweyn ee xoolaha dhoofisa. Waxa kale oo uu sheegay ganacsade Cali in tiradda xoolaha ee sayladaha la keenay ay sanadkan aad u badnayd, isla markaana aanu qiimaha xoolaha gaar ahaana Adhiga aanu sanadkan hoos u dhicin, iyada oo la kala siisanayay inta u dhaxaysa $80 ilaa $90 dollar. “Sanadkan qiimaha xooluhu marnaba ismuu beddelin, waxaanu ku dhamaaday Adhiga $ 80 ilaa $ 90 inta u dhexeysa, xoolaha sayladaha iminayay way badnaayeen. sanadkan dunida xoolaheena aad baa looga raraa waxaana jira waddamo inaga xoolo waaweyn oo inala tartamaya, waxa la inooga baahan yahay in dadka Soomaalida ah ee xoolaha dhaqda ee xoolahooda si fiican u naaxiyaan oo tartanka u diyaarayaan,”ayuu yidhi Cali Ibraahim Ciise.
By: Idiris M.Jaamac
Dawannews Hargeysa office
