Hargeysa (DAWAN): Maamulka gobolka Maroodi Jeex iyo golaha deegaanka ee Hargeysa ayaa ku fashilmay in ay wax ka qabtaan dhallinyaro koox koox ah oo xilliyada habeenkii iska hor imaad ku dhex marro xaafadaha magaaladda Hargeysa, kuwaas oo ku hubaysan faashash, budhadh iyo tooriyo ay isku adeegsadaan.
iska hor imaadyadan dhalinyaradda ayaa kii u dambeeyay waxa uu ka dhacay degmadda Maxamuud Haybe ee magaaladda Hargeysa, waxaana dagaalkan gacan ka hadalka ah uu sababay in dhaawacyo ay soo gaadheen qaar ka mid ah dhallinyaradan iska hor imaadyaddu dhex mareen oo ka soo kala jeeda xaafadaha Calaamadaha iyo xidigta.
Wargeyska Dawan oo u kuur galay rabshadahan dhallinyaradda ee xaafad xaafad isku weeraraya, waxaanay dad goob joog ka ahaa rabshadahan iyo iska hor imaadkan dhex maray dhallinyaradani noo sheegeen in khasaare ka soo gaadhay meheradaha ganacsi ee ku yaalla degmadaasi oo ay boob u gaysteen.
Waxa kale oo dadka aanu waraysanay ay noo sheegeen in sidoo kale dhallinyaradani dagaalantay ay waxyeelo gaadhsiiyeen baabuur maraysay wadadda ka dib markii dhagaxaan ay isku shiidayeen dhalinyaradaasi ay ku dhaceen baabuurtaasi.
Maamulka gobolka Maroodi Jeex iyo golaha deegaanka Hargeysa oo u xil ka saaran inay si joogto ah ula socdaan Nabadgelyo ee caasimadda, ayaa waxa ay indhaha ka qarsadeen dhallinyaradan rabshadaha iyo iska hor imaadka hubaysan ka samaynaya xaafadaha magaaladda, taas oo ahayd in ay ciidamada booliska kala shaqeeyaan sidii loo xoojin lahaa nabadgalyadda magaaladda, isla markaana ay isugu hawli-lahaayeeeen heshiisiinta dhallinyaradan.
Dawannews Hargeysa office
