Hargaysa (Dawan): Wasaaradda Caafimaadka Somaliland ayaa sheegtay in ay sanadkan casriyayn doonto dhamaanba cusbitaaladda waa weyn ee lagu daaweeyo dadka uu ku dhaco xanuunka Dhimirku.
Sidaasina waxa shaaca ka qaaday agaasimaha guud ee wasaaradda caafimaadka Dr. Cismaan Xuseen Warsame, mar uu shalay hadal ka jeediyay xaflad loo sameeyay maalinta caalamiga ah ee Dhimirka aduunka oo shalay lagu qabtay hudheelka Maansoor ee magaaladda Hargaysa.
Xafladaasi oo ay ka soo qaybgaleen masuuliyiinta wasaarada caafimaadka u qaabilsan xanuunada dhimirka Hay’adaha Wasaaradda caafimaadka kala shaqeeya cisbitaalada lagu daaweeyo dadka uu xanuunka dhimirka ku dhaco iyo marti sharaf kala duwan.
Agaasimaha guud ee wasaarada caafimaadka Somaliland Dr. Cismaan Xuseen Warsame oo ka hadlay xafladaasi lagu xusayay xuska maalinta Dhimirka aduunka ayaa ka waramay u jeedadda laga leeyahay xuska dadka Dhimirka qaba iyo sidoo kale qorshaha wasaaradda Caafimaadka eek u waajahan sidii wax loogu qaban lahaa dadka uu haleelay xanuunka maskaxdu.
Isaga oo arrimahaasi ka ahdlayayna waxa uu yidhi yidhi “Hal-ku-dhig sanadka ee caalamka iyo Somaliland laga xusaya waa la noolaada si fiican dadka uu ku dhacay xanuunka dhimirku. Qorshaha wasaaradda waxa weeye in sanad ka dib u habayn iyo casriyayn lagu sameeyo guud ahaan cisbitaalada lagu daaweeyo dadka xanuunka dhimirka ee magaalooyinka waaweyn, waxaana imika dhamaaday cisbitaalka dhimirka ee magaalada Berbera, qorshaha sanadkana waxaan ugu jira magaalooyinka Burco, Hargeysa iyo Gabiley.”.
“Waxa kale oo aanu ku talo jirnaa in aanu guud ahaan dib u habayn iyo casriayan ku samayno cisbitaalada gobolada ee lagu daaweeyo dadka qaba xanuunka dhimirka, qorshaha labaadna waa in aanu sameyno meelo ay wax ku bartaan dadkaasi marka ay bogsadaan Insha Allaa Agaasimaha Cismaan Xuseen Warsame.
Dhamaan madaxdii kale ee iyagna ka hadashay xafladaa loo sameeyay maalinta la xuso dadka dhimirka ee lagu qabtay Hargeysa ayaa sheegay in guud ahaan bulshada reer Somaliland looga baahan yahay inay ka dhabeeyaan hal-ku-dhigaasi sanadka la isla qaatay ee ah si fiican ula noolaada dadka uu ku dhaco xanuunka dhimirka maadaama oo dalka ay ku soo badanayaan dadkaa uu ku dhaco xanuunka dhimirku, waxa la doonayaa inuu si fiican ula dhaqmo diinteena suuban waxa ay ina faraysaa in la dhawro oo la ilaaliyo dadka jilicsan.
By: Idiris Muxumed
Dawannews Hargeysa office
