Wajaale (Dawan): Dawladda Somaliland ayaa tahriibeyaashii ugu tiradda badnaa ku wareejisay dawladda Federaalka ee Itoobiya, kuwaas oo dhamaantoodba u dhashay Itoobiya.
Tahriibeyaashani oo ay tiradoodu dhamayd 162 qof ayaa waxaa shalay gelinkii danbe ku wareejiyay dawladda Itoobiya taliyaha laanta socdaalka ee Somaliland gaashaanle sare Maxamed Cali Yuusuf, iyadoo ay kulak ala wareegeen magaaladda Wajaale ee ku taalla xadka u dhexeeya labadda dal.
Gaashaanle sare Maxamed Cali Yuusuf, oo telefoonka ugu waramay wargeyska DAWAN, ka dib markii uu tahreebeyaashaasi ku wareejiyay Itoobiya, isaga oo joogay Wajaale ayaa noo xaqiijiyay inay shalay si rasmi ah ciidamadda booliska ee federaalka Itoobiya ugu wareejiyeen tahriibeyaashaasi, kuwaasi oo uu sheegay in ay dhawaan ciidamadda booliska iyo kuwa laanta socdaalka ee Somaliland ka soo qabteen agagaarka magaalooyinka Hargeysa iyo Faro-weyne.
Isagoo arrimahaasi ka hadlayayna waxa uu yidhi “Tahriibeyaashaasi waanu ku wareejinay Itoobiya, waxaanay tiradoodu dhamayd 162 qof, oo kala ahaa 65 Oromo ah, 62 Axmaaro ah iyo 35 Tigreey ah. waxaanu ka qabanay agagaarka Hargeysa iyo Dararweyne ayay booliska iyo laanta socdaalka oo iskaashanayaa ka soo qabteen, markaa booliska ayaa nagu soo wareejiyay, anaguna waxaanu ku wareejinay ciidanka booliska ee Itoobiya, maanta (shalay) ayaanu wareejinay saacad ka hor ayaanay ahayd, imika Wajaale ayaan ku suganahay. Waxaanu ka wareejinay ciidanka booliska ee federaalka Itoobiya”.
Taliyaha laanta socdaalka Waxa uu tilmaamay in uu jiro heshiis ka dhexeeya Somaliland iyo Itoobiya oo sheegaya in la isku celiyo tahriibeyaasha iyo wixii sharci darro ku soo gudba. “Wuu jiraa heshiis iskaashi oo ka dhexeeya Itoobiya iyo Somaliland oo sheegaya isku celinta tahriibeyaasha iyo wax alla wixii sharci darro ku talaabaya, heshiisyo ayaa ka yaala” ayuu yidhi Gaashaanle Maxamed Cali Yuusuf.
Waxa kale oo uu sheegay in labadii maalmood ee u danbeeyay uu socdaal ku soo maray magaalooyinka ku teedsan soohdinta u dhexaysa Somaliland iyo Itoobiya ee gobolada Maroodi Jeex, Gabiley iyo Awdal isagoo dhinaca kalena dhagax dhigay xarumaha ay ciidanka laanta socdaalku ku yeelan doonaan magaalooyinka Faro-weyne iyo Allaybaday. waxaanu yidhi “Waxaan kormeer ku soo maray magaalooyinka xadka ku teedsan, shalay Khamiistii (doraad) ayaan ka soo baxay Hargeysa Far-weyne, Allaybaday, Geed balaadh, Goroyo-cawl ilaa Boorama ayaan soo maray, waxaanay ujeedadda kormeerkaasi ahayd sidii wax looga qaban lahaa la dagaalanka tahriibka iyo dadka sharci darrada ku soo gelaya dalka iyo sidoo kale dhalinyarada reer Somaliland ee tahriibaya labadaba”.
Gaashaanle Maxamed Cali Yuusuf oo la waydiiyay in tahriibeyaasha u dhashay Itoobiya oo keliya ay dib u celiyaan iyo in cid kasta oo si sharci darro ah dalka ku soo gasha ay dalalkoodii dib ugu celiyaan, waxa uu ku jawaabay “Maya, Itoobiyaanka oo keliya ma celino, ee qolo kastaaba dalkii ay ka yimaadeen ayaa lagu celiyaa, qofna dal aanu u dhalan looma masdaafurin karo” ayuu yidhi taliyaha laanta socdaalku.
Dhinaca kale Maxamed Cali Yuusuf ayaa digniin adag u diray gaadiidlayda qaada ama sida sharci daradda ah dalka ku soo geliya tahriibeyaasha, waxaanu sheegay in cidii lagu qabto arrintaasi ay maxkamad la tiigsan doonaan.
By: Khadar Cabdi Muuse
Dawannews Hargeysa office
