Hargeysa(Dawan):- Xaaji Cabdikariin Xuseen (Cabdiwaraabe) oo ka tirsan Golaha Guurtida Somaliland, ayaa labada xisbi mucaarid ee WADDANI iyo UCID ugu baaqay inay qiraan wixii dawladdu qabatay isla markaana ay noqdaan mucaarid tilmaama wixii dalka ka dhiman ee lama huraanka ah.
Sidoo kalena waxa uu Madaxweyne Axmed Siilaanyo Ugu Baaqay inuu haneeyo oo uu si sharaf leh u wareejiyo xilka haddii lagaga guulaysto doorashadda fooda innagu soo haysa, haddii uu ku guulaystana mucaaridka looga baahan yahay inay u haneeyaan. Xaaji Cabdikariim Xuseen waxa uu sidaasi ka sheegay xaflad balaadhan oo ay goob joog ka ahaayeen Madaxweyne Axmed Siilaanyo iyo Labada Guddoomiye ee xisbiyadda qaranka.
“ Mucaaridka waxaan leeyahay doorashaa inagu soo socota Madaxweynuhuna wuu sharraxan yahay, Madaxweyne haddii lagaa helo si wannaagsan u hannee sidii Daahir Rayaale,waar haddii uu helana u hanneeya oo yaan la odhan waa lagu shubtay, Madaxweyne dul ogow oo haddaad ku soo noqotana Illaahay baa hayee dul-qaad ogow haddii aad waydana sharaf iyo wanaag ogow oo kaga tag,”ayuu ku dardaarmay Xaaji Cabdi Waraabe.
“Mucaaridka laga maarmi maayo waxa dhiman waa in la tilmaamaa,afar madaxweyne ayaa soo maray Somaliland mid waliba wax buu qabtay,”ayuu yidhi Xaaji Cabdi-waraabe, isagoo hadalkiisa sii watayna waxa uu intaas raaciyay “Cabdiraxmaan Axmed Cali Madaxweynihii ugu horreeyay ee Somaliland waxaa uu qabtay amuuro aanan wada gaadhayn,wuxuu nasiib ku lahaa xorayntii dalka ee uu Axmed Maxamedkani u dhiibay Balligubadle ee uu dalka lagu soo galay,waxaa kale oo uu nasiib ku lahaa in uu isu wada keenay oo dadka reer Somaliland min galbeed illaa bari ee uu Burco shirka ugu wada qabtay,waxaa kale oo uu nasiib ku lahaa siduu noogu wareejiyay.”
Waxaanu intaa uga sii gudbay oo uu is raaciyay Madaxweynihii labaad ee Somaliland Maxamed Ibraahin Cigaal Alle ha u naxariistee iyo Madaxweynihii sadexaad ee xilka ku wareejiyay Madaxweyne Siilaanyo Daahir Rayaale. Waxaanu yidhi Xaajigu “Madaxweyne Maxamed Ibraahim Cigaal ALLE ha u naxariistee waxaa uu qabtay seeska Dawladnimo ayuu inoo dhisay,Madaxweyne Daahir Rayaalena ciidanka ayuu inoo dhisay,ina Cigaal ciidamada wuu nec baa booliska maahee oo waa kuwii xidhay.”
Waxaa uu Xaaji Cabdiwaraabe wax ka tilmaamay wax qabadka Xukuumadda maanta tallada haysa ee uu gadhwadeenka ka yahay Madaxwweyne Axmed Siilaanyo in ay qabatay wax aanay dawladaha waaweyn ee uu maraykanku kow ka yahay aanay ku qaban Karin 100 sanadood. “Dawladda maantana ee uu Madaxweyneha ka yahay Axmed Maxamed Halkii ayay ka qaaday habkii dawladnimeenu u tallaabsatay dawladaha boqolka jiray siday u socdaan bay u socotay,dawladi waa shaqaale shaqaalihii oo aan lacag looga tegin ayay badhida u dhigeen oo ay lacagtii u kordhiyeen kolka shaqaaluhu degaabay dawladnimadu socotaa,waxay ku tallaabsadeen,waxay ku tallaabsadeen nabad gelyada waxay ku tallaabsadeen waddooyinkii,waxay ku tallaabsadeen dhismayaasha,waxay ku tallaabsadeen Diinta, umadi haddaanay diinteeda ku duubnayn ma dhisanto aqal walba 24 ka saacadoodba raadyawgii ayaa dhegta lagu hayaa oo quraankii ka socdaa waxay ku tallaabsadeen oo a oo ay dhiiri gliyeen culimo awdiinka waxaynu dheernahay Soomaaliya waa culimadeena Illaahay cimriga ha u barakeeyee.”
Xaaji Cabdi-waraabe Waxa uu tallo inay mucaaridku qiraan wannaaga iyo wax qabadka aan la tiring Karin ee ay Xukuumaddu ku qabatay muddada kooban taas oo uu sheegay in aan dawladaha waaweyni ku qaban “Waxaan leeyahay wanaag ninkii doonayoow mucaarad sharaf leh noqo,inta adduunku dhisan yahay wax waa dhiman yihiin waxa dhiman oo aad dawladda u sheegto oo aad qabta tidhaahdo waayi maysid.laakiin siday wax u qabteen si aan si aan Maraykanku wax u qabanin bay wax u qabteen,”ayuu yidhi Xaaji Cabdikariin Xuseen Yuusuf, waxaanu intaas ku kabay “Halka dhiman haddii la tilmaamayo biyihii oo ceelashii qodan yihiin ayaa dhiman,sibidhkii oo agteena ah ayaa isna dhiman dee kuwaa adeerayaaloow sheega,waar mucaaridku waxa maqan ha sheego ee dadka dantiisa ah, laakiin wax aan jirin haddii uu sheego cidina ninkaa maqli mayso.”
Xaaji Cabdirakiin Xuseen Cabdiwaraabe oo ka hadlayay doorashooyinka Somaliland ku soo fool leh ee u qorshaysan in kal dambe bisha lixaad la qabto,ayaa Madaxda Mucaaridka iyo Madaxweynaha labadaba kula dardaarmay in ay aqbalaan natiijo kasta oo ka soo baxda doorashooyinka soo socda.
By:Faysal Xiis Weerar(Afgaab)
Dawannews Hargeysa office