Hargeysa (Dawan)- Xildhibaan Cabdiqaadir Maxamed Xasan (Indho-indho) oo ka tirsan Golaha Guurtida Somaliland aya sheegay in muddo kordhinta muddo xileedka golayaasha Qaranka ay u kordhiyaan aqalkoodu tahay mid sharci ah oo dastuuri ah.
Waxa kale uu farriin cad u diray xildhibaan Indha Indho beesha caalamka oo uu ku war galiyay in Madaxwaynaha Soomaaliya in uu jabiyay isla markaana uu ka baxay qoddobadii ay ku heshiiyeen ee ay kala saxeexdeen Madaxweynaha Somaliland shirkii ku qabsoomay dhawaan dalka Jabuuti isla markaana caalamku markhaatiga ahaa.
Ugu horrayn Xildhibaan C/Qaadir Maxamed Xasan oo ka jawaabayay hadal dhawaan ka soo yeedhay Guddoomiyaha Xisbiga Mucaaridka ah ee UCID Ing Faysal Cali Waraabe oo tilmaamay in doorashooyinku dib u dhacayaan kuna sababeeyay arrin farsamo kana saaray meesha doorka golaha Guurtidu ku leeyihiin sharciyan marka dib u dhac ku yimaaddo Doorashooyinka, waxaanu yidhi “Sida uu Faysal Sheegay arrin farsamo maaha ee waa arrin dastuuri ah oo sharci ah,annaguna(Guurtida)gabiyaguba waxaanu wax kordhinaa waa markay doorashooyinku qabsoomi waayaan wakhtigii loogu tallo galay bil ka hor,markaa iyadoo aanay doorashaba dhawayn ciddii shaqadaa lahaydna aanay sheegin In ay qabsoomayaan doorshooyinku iyo inkale annagu(Guurtidu)kama hadallo.”
Xildhibaan Cabdiqaadir Maxamed Xasan (Indho indho)waxaa kale oo uu faah faahin ka bixiyay goorta ay gole guurti ahaan sharciyan xaq dastuuriya u leeyihiin in ay sameeyaan muddo kordhinta golayaasha qaranka taasi oo uu sheegay in aanay imika taagnayn.
“Xiliga kaliya uu sharcigu nasiinayaa waa marka ay bili ka hadho xiliga doorashada, imika muddo lix bilood iyo dheeraad ah baa ka hadhay wakhtina ma dhowa, anigu waxa kaliya ee aan ka hadlayaa waxay tahay ta uu Faysal leeyahay waa arrin farsamo ee arrin Dastuuriya maaha oo aan leeyahay waa dastuuri, annaguna doorashooyinku marka ay qabsoomi waayaan bil ka hor ee ay komishankanna ka timaado ayaanu mudada samaynaa, markaasaanu wax ka nidhaahnaa annagoo duruufahana eegayna ayaanu tilmaanaa muddada ay doorasho ku qabsoomi karto,”ayuu yidhi Md. Cabdi-qaadir Maxamed Xasan.
Xildhibaanku waxa kale oo uu ka hadlay wada hadalkii Somaliland iyo Soomaaliya ku dhex maray dalka Jabuuti oo uu sheegay in uu jabiyay kana baxay Madaxweynaha Soomaaliya, waxaanu yidhi “Madaxweynaha Soomaaliya wuxuu ogyahay in Somaliland la yidhi laba dawladood u wada-hadla, waxaan beesha caalamka iyo dawladda Maraykankaba u sheegayaa in uu Xasan Sheekh Maxamuud qodobadii Somaliland iyo Soomaaliya ku heshiiyeen ee caalamku ansixiyay uu jabiyay.”
“Waxaan leeyahay Xasanoow dhibaato kugu filan way ku haysataa. Garoowe illaa Kismaayo ayaad madaxwayne u tahay, annaga madaxwayne waxa noo ah Axmed Maxamed Maxamuud (Siilaanyo). Adduunka waxaanu u sheegaynaa dhibaatada deegaannadayadii ka taagan, cid ku wehelisaa ma jirto Xasan Sheekh Maxamuud,”ayuu ku dooday Xildhibaanku.
Xildhibaan Indho-indho waxaa kale oo uu kadlay siyaasiyiinta ka soo jeeda deegaanka gobolka Sool ee Somaliland-diidka ah oo uu sheegay in aanay macno badan lahayn in ay sawiro la galaan Madaxda Xamar, waxaanu yidhi “Ninka Indho sheel la yidhaahdo ee aan Xildhibaanka u ahay Inuu diyaarad raaco oo uu Xasan isla soo sawiro waanu arkaynaa. Haddii magacii beeshii Dhulbahante noqday Khaatumo, aniguna Khaatumo-da Somaliland ayaan ahay, Indho-sheelna waa Khaatumada Xasan Sheekh Maxamuud,” ayuu yidhi Mudane Cabdiqaadir.
By: Faysal Xiis Weerar(Afgaab)
Dawannews Hargeysa office
