Hargeysa (DAWAN)- Maxkamadda Gobolka Maroodi Jeex ayaa shalay soo gunaanaday dacwada afar eedaysane oo lagu soo qabtay idaacad sharci darro ah oo la magac baxday BAADI-GOOB oo ka hadli jirtay magaaladda Hargeysa xilliyada habeenkii, taas oo ciidamadda boolisku gacanta ku soo dhigeen dabayaaqadii bishii Nofember ee sanadkii hore.
Fadhigan Maxkamadda Gobolka Maroodi-Jeex ku soo khatimaysay afarta eedaysane ee lagu eedaynayo idaacadaasi sharci darada ah oo magacyagoodu kala ahaayeen C/laahi Axmed Diiriye, Xamse Axmed Xuseen, Cabdoo Aar iyo Yoonis Faarax Cismaan, ayaa dhagaysigeeda waxa ka qayb-galay xeer ilaalinta gobolka Maroodi Jeex, qareenada difaacaya eedaysanayaasha iyo dadweyne kale.
Xeer ilaalinta gobolka Maroodi Jeex ayaa fadhigaasi ka akhriday gal-dacwadeedka eedaysanayaasha, waxaana ay sheegtay in idaacadaasi sharci darrada ah ay ka sii daayeen warar been abuur ah iyo dacaayado dadka lagu kicinayo oo lagaga hor keenayo qaranka Jamhuuriyada Somaliland, isla markaana ay ku kala qaybinayeen ummadda reer Somaliland.
Qareenada difaacaya eedaysanayaasha ayaa iyaguna ka difaacayay eedaymaha ay xeer ilaalinta soo bandhigtay ee lagu eedaynayo eedaysanayaasha, waxaana Maxkamadda Gobolka Maroodi jeex mudaysay in fadhi dambe oo ay yeelan doonto ku shaacin doonto xukunkooda.
Dawannews Hargeysa office
Home Wararka Dalka Maxkamadda Hargeysa Oo Soo Gunaanaday Dacwada Kooxdii Lagu Qabtay Idaacadii Sharci...