Hargaysa (Dawan): -Hor-joogaha kooxda nabad-diidka ah ee Khaatumo Cali Khaliif Galaydh, ayaa ka waramay nashqadaha dhagaro iyo colaado uu ka taageerayo Madaxweynaha dawladda Soomaaliya, oo uu sheegay inay ka heshiiyeen khilaaf hore ugu dhaxeeyay dawladda Villa Soomaaliya iyo kooxda khaatumo-seeg.
Dagaal ooge Cali Khaliif waxa uu sheegay in kulan ay yeesheen madaxweynaha Soomaaliya uu u balan-qaaday inuu ku taageerayo qas iyo colaad kooxdiisu ka hurinayso deegaamo ka mid ah Sool. “Sida dadka siyaasadda la socdaa ay og-yihiin aniga iyo madaxweynuhu waanu is khilaafnay, arrimo siyaasadeed ayaananu isku qabanay. Haddana waanu ka heshiinnay oo waxaan ku heshiinay wax Khaatumo dhaqaya. annaga haddii aan Khaatumo State nahay dad lagu hanuuninayo ma nihin midnimada Soomaaliya, cid aan marti uga nahayna ma jirto, waxaanu qaadanaynaa doorka aan xaqa u leennahay,”ayuu yidhi Cali Galaydh oo u waramay Laanta afsoomaaliga ee BBC-da.
Dhinaca kale Mr. Galaydh, waxa uu ka hadlay wadahadaladii Turkiga ee ka fashilmay dhinaca maamulka Xamar, waxaanu yidhi “In Somaliland tidhaahdo dadka shirarka ka qayb-gelaya annagaa xulanayna oo nalama fara-gelin karo, dadka dawladdu soo dirsatayna tallo ka bixinayna, haddii sida aan jecel nahay aan wax loo wadinna shirkaan ka baxaynaa mid iyaga dhaqeysa ma aha.”
Taageerrada uu Madaxweynaha Soomaaliya Xasan Sheekh kula heshiisyay kooxda khaatumo, waa qoddob kale oo dhaawacaya jawigii wada wadahadallada u socday Somaliland iyo Soomaaliya.
Dawannews Hargeysa office
