Qiimaha Sarifka Dollarka ayaa sare u kaciisa laga dareemayaa Suuqyada Qiimaha Lagu badalo ama lagu sarifo lacagta dollarka kaas oo kor u kac balaadhani ku yimid maalmihii u dambeeyey, waxaana si dhab ah looga warhayn sababta dhabta ah ee keentay kor u kaciisa.
Qiimaha Sarifka Dollarka ayaa gaadhay boqolkii Dollar in lagu sarifo toddoba boqol iyo sided iyo Lixdan kun oo Somaliland Shilin ah.
Dadka ka ganacsada Sarrifka Lacagaha ayaa la sheegayaa inay hayaan ama kaydsadaan lacago ka badan kuwa Baanku suuqa soo galiyo ama taalaba, waxaanay markasta ku talogalaan inay iyagu kaga awood roonaadaan jarida qiimaha Sarifka lacagaha qalaad.
Si kasta ha ahaatee sicir bararka sarrifka lacagaha qalaad ayaa meel adag maraya, waxaanu u baahan yahay wax ka qabasho deg deg ah.
Kor u kacan ku yimid sarifka qiimaha doolarka ayaa laga cabsi qabaa inuu saamayn ku yeesho qiimaha maciishada kaas oo markay dhacdo sidan oo kale la fisho inuu hawada isku shareero qiimaha maciishada taas oo ay dadka qaar kuu sheegayaan in haddaba la dareemayo inuu is badel ku yimid qiimaaha maciishada qaarkood.
Ruun oo ka mid ah kumanaanka hooyo ee subaxii usoo jarmaada suuqyada si ay qoyskooda ugu helaan quutal daruuriga ayaa ka warantay kor u kaca sarifka doolarku uu ku yeelan doono qiimaha maciishada ee aan saldhiga lahayn waxayna tilmaamaysaa sida ay arintani isla markiiba u bedesho maciishada, waxayna tidhi: “ tani waa dhibaato haysata dadka danyarta ah ee ay dadkeenu u badan yihiin, ganacsataduna ma danaynayaan oo iyaga oo marba sabab u samaynaya ayay kordhiyaan qiimaha maciishada oo markii horaba aad ugu adkayd dad badan inay iibsadaan”.
Mar aanu waydiinay Farxiyaoo iyana ka mid ah dadka danyarta ah ee magaalada ku dhaqan in uu sababi karo qiimaha doolarka ee kordhay in uu kordho qiimaha maciishada ayaa tidhi: “ tani waa mar marsiyo hooyo ay samaystaan ragan u heshiiyay maatidan danyar ah , maxaa loo arkaa iyagoo ka cabanaaya marka uu doolarku kordho oo loo arki waayay iyagoo leh maantuu jabay qiimihiisii oo aanu maciishadiina aanu jabinaynaa ma jirto hooyo oo waa wax ay isla ogyihiin, waana loo heshiiyay maatidan tanina waa mar marsiyaha ay hadda kor ugu qaadayaan qiimaha maciishada”.
Dadka ayaa dhawraaya talaabada uu qaadi doono Baanka Dhexe oo xiliyadan oo kale talaabooyin hoos loogu dhigaayo qiimahan sare u kacay qaada iyo saamaynta uu ku yeelan doono kor u kac ku yimaada qiimaha maciishada.
Qaar ka mid ah sariflayaasha ayaa ku doodaya inay sabab u tahay kor u kacan ku yimid qiimaha sarifka doolarka dagaalada ka dhacay dalka Yeman iyo ganacsatada dalka oo doolar wax kusoo iibsada.
Balse waa la dhawri doonaa halka uu ku danbeeyo.
