Hargaysa (Dawan): Xisbiga mucaaradka ah ee Waddani oo muddooyinkanba ku hawlanaa qorsheyaal lidi ku ah qaranimadda Somaliland iyo shuruucda wadanka ayaa sheegay in Somaliland ay gacmo madhan ka taagan tahay sidii ay ictiraaf uga heli lahayd caalamka.
Waxaanu xisbigaasi ku kacay arrin dhabar-jab ku ah midnimadda iyo wada jirka umadda reer Somaliland kadib markii uu habeen hore hudheelka Maansoor ee magaaladda Hargaysa ku qabsaday xaflad lagu sheegay in ay ugu dabaaldegayaan xuskii 18-ka May, taasi oo maalintii Isniintii dalka iyo dibadda si weyn looga xusay.
Hase yeeshee xafladaasi uu xisbiga Wadaani sida gaarka ah u qabsaday oo aan si cad loo ogayn u jeedadda ay ka lahaayeen, maadaama oo uu masuulka ugu sareeya xisbigaasi oo ah guddoomiye Cirro munaasibadii xuska 18-ka May uu kaga qayb galay magaaladda Boorama. Balse uu xisbiga Waddani xaflad kale oo ay ku keliyaysteen ku qabsadeen Hargaysa xili habeenimo ah.
Munaasibadan oo u muuqatay mid indho sarcaad ah oo xisbiga Waddani ku sheegayay inay ku xusayaan 18-ka May ayaa noqonaysa markii u horaysay taariikhda inta ay Somaliland jirtay uu xisbi mucaarid ahi sidan oo kale qol madow kelidii ku qabsado munaasibad qaran, oo qiimo weyn u leh shacabka Somaliland.
Waxaanay arrintani ku soo beegmaysaa wakhti shaki badan ay shacabku ka muujinayaan siyaasadda guracan ee xisbiga Waddani uu cadowga Somaliland ugu gacan haadinayo. taasi oo mar kale mad-madow iyo shaki abuurtay, isla markaana muujisay in aanu xisbiga Waddani aaminsanaantiisa qadiyadda madax-banaanida Somaliland.
Guddoomiyaha xisbiga Waddani C/raxmaan Maxamed C/laahi (Cirro), oo hadal ka jeediyay xafladaasi ay qolka ku qabsadeen ayaa sheegay in beesha caalamku soo farogalin doonaan Somaliland, taas oo muujinaysa quusta uu ka taagan yahay inuu mansab madaxtinimo dalka ka qabto.
“18-ka May waa maalintii aynu caalamka u sheegnay in aynu noqonay dawlad madaxbanaan.Somaliland waxa ay dhistay hanaan dimuqraadiya oo ku salaysan axsaabta iyo saxaafadda, oo madaxbanaan labadiiba waxaanu maanta ka taaganahay gacmo madhan. Somaliland 24 sanadood waxay ka taagan tahay ictiraafka gacmo madhan.Hadii la heshiin waayo beesha caalamku way imanayaan, waanay ina soo farogalinayaan” sidaas ayuu ka sheegay C/raxmaan Cirro xafladaasi.
Sidoo kale guddoomiyaha Waddani ayaa iska indho tiray awoodda dastuuriga ah ee golaha Guurtidu ay u leeyihiin in ay mudeeyaan wakhtiga ku haboon in la qabto doorashooyinka iyo muddo kordhin ay u sameeyaan xukuumadda iyo golaha Wakiiladda.
Waxaanu yidhi “Axsaabtu waxay aqbaleen maalintii ay soo jeediyeen Komishanku in la qabto doorashooyinka, oo ah cida sharciyan iska leh qabashadda doorashadda. waxaa looga digay golaha Guurtida oo axsaabta iyo beesha caalamkuba uga dhigtay in aanay khilaaf ka abuurin Somaliland. Wixii looga digayayna way dhaceen”.
Dawan Staff
Dawannews Hargeysa office
