“Labadii Sannadood Ee Ugu Dambeeyay Miisaaniyadda Golaha Wakiiladda Lacag Xaqul Ciid Ahi Nooguma Jirin”

Hargaysa (Dawan): Xoghayaha guud ee Golaha Wakiiladda Somaliland C/risaaq Siciid  Ayaanle, ku xigeenka xoghayaha guud ee golaha Wakiiladda Jamaal Jaamac Jiir iyo sidoo kale  agaasimaha maamulka iyo xisaabaadka  ee golahaasi   Cabdi Ismaaciil,  ayaa beeniyay war uu golaha Wakiiladda  ka  qoray wargeyska DAWAN, cadadkii 33365 ee soo baxay  Isiintii  todobaadkani.
 
Warkaasi oo ciwaankiisu ahaa “Guddoomiye Cirro  oo ku tagri-falay kharashaadkii xaqul ciidka shaqaalaha golaha wakiiladda”.  masuuliyiintaasi oo shalay si wada jir ah shri jaraa’id ugu qabtay xarunta golaha Wakiiladda ee magaaladda Hargaysa ay  iska baraxeen  warkaasi  ku   saabsanaa in guddoomiye Cirro  lunsaday kharashaadkii xaqu ciidka ee shaqaalaha golahaasi. Waxaanay  sheegeen xubnahaasi   in aanay miisaaniyad-sanadeedka 2014 ilaa 2015  ee golaha Wakiiladda aanu wax xaqul ciid ahi ugu  jirin in xaqal ciid la siiyo shaqaalaha golahaasi, isla markaana aanay jirin  lacag uu  guddoomiyaha golaha Wakiiladu ka  lunsaday shaqaale hoosaadka golahaasi.
 
C/risaaq Siciid Ayaanle, xoghayaha guud ee golaha Wakiiladda oo ugu horayn shirkaasi jaraa’id ka hadlay  ayaa sheegay in wargeyska DAWAN uu caadaystay wax ka sheega golaha Wakiiladda, isla markaana uu dhawr jeer oo hore ka qoray warar  uu been abuur ku tilmaamay, waxaanu yidhi   “Waxaanu  maanta (shalay)  ka  jawaabaynaa  war uu  qortay   wargeyska DAWAN  ee qaranka, kaasi  oo caadaysatay in uu  mar walba wax ka sheegto golaha  Wakiiladda.  Waxay    jariiradaasi  sheegtay  in  guddoomiyaha golaha  Wakiiladda iyo xoghayaha guud  ka cuneen xaqal ciidkii la siin jiray shaqaalaha golaha,  waxa aan idin tusaynaa miisaaniyadii golaha Wakiiladda, oo cadaynaysa in aanu ku jirin in wax xaqul ciid ah la siiyo shaqaalaha golahaasi.”
Waxa  kale oo uu sheegay C/rasaaq  Ayaanle  in toddobaadkan aynu ku jirno  ay soo saari doonaan Majalad yar (magazine)  ka hadlaya shaqada golaha  Wakiiladda iyo xeerarka dalka.  “Golaha wakiiladu waxa uu soo saarayaa magazine la yidhaahdo xogsidaha golaha wakiilada,  saddexdii biloodba mar ayay soo baxaysaa,  toddobaadkan ayaanay soo baxaysaa.
Waxaanay   ka hadlaysaa waxqabadka golaha wakiiladda in dadka dawladnimadda la baro waxa kale oo ay ka hadlaysaa shaqada goluhu  hayo iyo shuruucda dalka waana markii uu horaysay ee golaha wakiialdu yeesho magazine waxaana naga caawiyay Nagaad network waana bilaash dalka oo dhan ayaan gadhsiin doonaa” ayuu yidhi xoghayaha guud ee golaha Wakiiladu.
 
Dhinaca kale Cabdi Ismaaciil Xawaadle oo ah Agaasimaha maamulka iyo xisaabaadka ee golaha wakiiladda oo isna shirkaasi jaraa’id ka hadlay ayaa sheegay in  miisaaniyadda golaha Wakiiladda ee sanadaha  2014 ilaa 2015 aanay ugu jirin wax xaqul  ciid ah  shaqaalaha golahaasi.  Waxaanu  yidhi “Waxaan  ka jawaabayaa wax  shalay (doraad)  aan jaraa’idka ku arkayay.  golaha wakiiladu waxa uu ku dhaqmaa sida wasaarad kastaaba  ugu dhaqanto.  Miisaaniyad  ayuu leeyahay,  waxaana  ku qeexan mushaharooyinka, shiidaalka,  wixii gunooyin ah,  wax waliba halkaas ayay ku qeexan yihiin,  wax qarsoona ma aha,  miisaaniyad waliba waxay  ka kooban tahay labo sanadood.
2014 ilaa 2015 intay ahayd labadii sanadood ee u danbeeyay wax xaqul ciid la yidhaahdo oo miisaaniyadda noogu jiray ma jirto,  markaa jaraa’idka  waxan qoray isagaa  ka jawaabi doona.”
Sidoo kale waxaa isna halkaasi ka hadlay xoghaye ku xigeenka golaha Wakiiladda Jamaal Jaamac Jiir, waxaanu sheegay in aanay wax ka jirin warka uu wargeyska DAWAN ka qoray golaha Wakiiladda. Waxaanu  u soo jeediyay wargeyskaasi in uu raali-gelin ka bixiyo warkaasi beenta ah ee uu qoray, maadaama oo uu yahay wargeys qaran.
By: Khadar M. Dhako
Dawannews Hargeysa office