Hargeysa (Dawan): Gudi hoosaadka arrimaha dibada ee golaha Wakiilladda Somailland ayaa shalay kulan xog waraysi ah la yeeshay wasiirka ku xigeenka wasaaradda arrimaha dibada mudane Axmed Aadan Ismaaciil (Kayse).
Kulankaasi oo ay war-baahintu banaanka ka joogtay ayaa markii uu soo dhamaaday waxaa ka warbixiyay waxyaabihii ay iskula soo qaadeen guddoomiyaha gudi hoosaadka arimaha dibada ee golaha wakiiladda Axmed Cabdi Kijaandhe.
Waxaanu sheegay xildhubaan Kijaandhe, in wasiir ku xigeenka ay wax ka weydiiyeen aragtidiisa ku aadan xaga siyaasada arrimaha dibada, isagoo carabka ku dhuftay inuu yahay shakhsi u qalma xilka loo igmaday.
Xildhibaan Kijaandhe oo arrimahaasi ka hadlayayna waxa uu yidhi “Waxaanu ugu yeedhnay wasiir ku xigeenka arrimaha dibada in aanu ka waraysano aragtidiisa ku waajahan xagga arrimaha dibada iyo ictiraafka, ee ku waajahan inta aan la ansixin. Waa tii dhawaan la magacaabay waxa aanu u aragnaa inuu yahay nin u qalma oo aqoon u leh hawshan loo igmaday.”
Dhinaca kale Wasiir ku xigeenka arrimaha dibada oo isna ka hadlay ayaa sheegay in gudi hoosaadka arrimaha dibada ay ka wada hadleen ictiraafka Somaliland iyo wada hadaladii u dhexeeyay Somaliland iyo Soomaaliya.
“Xog-waraysi ayaan wada yeelanay gudi hoosaadka arrimaha dibada ee golaha wakiilada si fiicana wuu noogu dhacay xog waraysigaasi. Waxaanu iska waraysanay arrimaha ictiraafka, waxyaabaha inoo qabsoomay iyo wada hadaladii u dhexeeyay Somaliland iyo Soomaaliya iyo waxyaabo kale oo badan iyo sidii aan u dardar gelin lahayn shaqadda wasaaradda arrimaha dibadda”ayuu yidhi Md. Kayse.
Dawannews Hargeysa office
