Hargeysa (Dawan): Jaamacadda GOLLIS ee magaaladda Hargaysa ayaa shahaadooyin ku maamuustay shaqsiyaad ay sheegeen in ay dhanka arrimaha bulshada horumaar ka sameeyay, isla markaana kaalin weyn kaga jira wax u qabashada bulshadda.
Xildhibaan Mubaarik Yuusuf Cilmi Bidhi oo ka mid ah golaha Degaanka Burco, ayaa ka mid ahaa dadkii ay jaamacadda GOLLIS ku maamuustay shahaado sharaf uu ku mutaystay wax qabadkiisa muuqda ee uu mar kasta u taagan yahay iyo kaalinta wax ku oolka ah ee uu ka geysto caawinta dadka jilicsan iyo arrimaha dhalinyarada.
Mubaarik Bidhi, ayaa shahaado sharafta uu wax qabadka ku mutaystay ee ay ku maamuustay Jaamacadda GOLLIS waxaa guddoonsiiyay Madaxweyne ku-xigeenka Somaliland Cabdiraxmaan Cabdilaahi Ismaaciil (saylici).
Munaasibad ay Jaamacadda GOLLIS qabatay oo ku beegnayd sanad guuradii tobnaad ee Jaamacadda kana qalin jabiyeen kun arday, ayaa lagu sheegay in uu shahaado sharafta Xildhibaan Bidhi ku mutaystay kaalinta muuqata ee uu kaga jiro horumarinta gobolka Togdheer iyo gaar ahaan degmada Burco ee uu xildhibaanka ka yahay. Guud ahaan masuuliyiintii munaasibadda ka qayb gashay iyo madaxda Jaamacadda Golis ee xildhibaanka Shahaado sharfta ku maamuustayba waxa ay ka marag kaceen in xildhibaan Biddhi uu yahay masuul qaran oo u taagan wax u qabadka bulshada uu mudanaha u yahay isla markaana waxay ku dhiiri galiyeen in uu halkaa ka sii wado samaanta iyo wanaagga uu dadkiisa iyo dalkiisa ugu adeegayo. Xildhibaan Mubarik Bidhi ayaa gebogabadii Xafladda waxa uu sheegay in uu Jaamacadda GOLLIS uga mahad celinayo shahaado sharafta ay ku maamuuseen isla markaana uu u qaadanayo dhiiri galin, waxaanu ballan qaaday in uu ka shaqaynayo mar walba u adeegidda dadkiisa iyo dalkiisa wakhtigiisa ugu badana uu galinayo wax u qabadka dadka jilicsan iyo dhaalinyarada.
Dawannews Hargeysa office