By: Khadar Cabdi Muuse
Hargaysa (Dawan):- Wasiirka wasaaradda Wershadaha Somaliland Md. Shucayb Maxamed Muuse, ayaa iska baraxay warar sheegayay in uu dalka Holland kaga qayb galay shir loo qabtay dawladda federaalka Soomaaliya iyo maamul-goboleedyadda hoos taga, isla markaana aanay Somaliland qayb ka ahayn.
Hase yeeshee wasiir Shucayb ayaa eedahaasi dhinac isaga leexiyay, waxaanu sheegay in shirkii uu dhawaan dalka Holland kaga qayb galay oo ku saabsanaa maal-gelinta wershadlayda uu ahaa mid lagu soo casuumay Somaliland.
Shucayb Maxamed Muuse, oo shalay dalka dib ugu soo laabtay oo markii uu ka soo degay garoonka diyaaraha magaaladda Hargaysa warbaahinta la hadlay ayaa sheegay in shirkaasi si gaar ah loogu soo marti-qaaday Somaliland, isla markaana uu shirkaasi kaga qayb galay magaca Somaliland.
Isagoo faahfaahin ka bixinayay shirkaasi iyo wixii uu ku saabsanaa waxa uu yidhi “Haddii aan si kooban uga hadlo waxa uu daaranaa safarkii aan ku tegay wadamo ka tirsan qaaradda Yurub, safarkaasi waxa uu ahaa mid shaqo. Hay’adda la yidhaahdo Spark oo ka diiwaangashan dalka Holland, un axil saran tababar-siinta wershadlayda ayaa casuumad noo soo dirtay.”
“Markii ay casuumadu na soo gaadhay, aniga iyo wasiirka arrimaha dibadda ayaa ka wadatashanay, waxaananu isla garanay in hay’adaasi ay casuumadda si jamac ah u soo direen. Sidaas darteedna ay Somaliland mid gaar ah u soo diraan, waanay u soo direen Somaliland casuumad gaar ah. Waxaanan shirkaasi kaga qayb galay magaca Somaliland” ayuu yidhi wasiirku.
Waxa uu ka war-bixiyay waxyaabihii uga soo qabsoomay shirkaasi iyo madaxdii uu kulamadda la yeeshay. Waxaanu yidhi “Waxyaabaha shirkaasi nooga soo qabsoomay, waa markii u horaysay ee aan la kulano wasiirka ganacsiga dalka Sweden oo aanu kala hadlaynay waxyaabo ina khuseeya.
Haddii ay tahay dhinaca wershadaha, haddii ay tahay Korontadan inagu qaaliga ah sidii la inooga caawin lahaa.Netherland (Holland), iyadna waxaanu kala kulanay gudidda joogtadda ah ee baarlamaanka. Markasta oo aanu kulan samayno magaca Somaliland ayaanu ku hadlaynay”.
Dhinaca kale Shirkaasi oo sidoo kale lagu soo casuumay masuuliyiin ka socday dawladda Soomaaliya, ayaa wasiirka oo saxaafadu wax ka waydiisay in uu kulamo gaar ah la yeeshay xubnaha ka socday dawladda Xamar, waxa uu ku jawaabay “Ma jirin wax kulan gaar ah oo na dhexmaray masuuliyiinta Soomaaliya. Qof waliba waxa uu sharaxayay qadiyadda wadankiisa iyo fursadaha maal-gashi eek a banaan. Kulankani muu ahayn mid Soomaaliya oo keliya loo qabtay, waxaa ku jirtay Holland, waxaa ku jirtay Sweden, waxaa ku jirtay Denmark oo aanan anigu tegin, waxa kale oo ku jirtay Norway oo markii danbe laga baaqday.Markaa shir Soomaalidda oo qudha loo qabanayay oo u gaar ah, muu ahayn. Balse wuxuu ahaa shirk a balaadhan, oo aynu la leenahay, oo aynu danaheena iyo nabadgeliyadeena, dimoqraadiyadeena iyo horumarkeena ku sharaxaynay ayuu ahaa. Arrintii cashadda ahayd, oo aad loo buun-buuniyay waxay ahayd maalgashadeyaal iyaga laftoodu doonaya in ay dalkeena maalgashadaan oo na casuumay”ayuu yidhi wasiirka wershadaha.