Madaxweyne Siilaanyo Oo Kulan Xog-waran Ah Markii U Horeysay La Yeeshay Masuuliyiinta Dallada Ay Ku Bahoobeen Dhalinyaradda Somaliland

Dullucda Shan Qoddob Oo Masuuliyiinta SONYO Ka Dalbadeen Madaxweynaha In Loo Fuliyo
By: Cumar M.Faarax
 
Hargeysa(Dawan)-Madaxweynaha Somaliland Md. Axmed Maxamed Maxamuud (Siilaanyo) ayaa shalay kulan la yeeshay masuuliyiinta dalladda heer qaran ee dhalinyarrada Somaliland ay ku bahoobeen ee SONYO.
Sidaasna waxa lagu sheegay war-saxafadeed uu soo saaray afhayeenka madaxtooyadda Md. Xuseen Aadan Cigge (Xuseen Deyr) oo u dhignaa sidan:- “Madaxweynaha Jamhuuriyadda Somaliland Mudane Axmed Maxamed Siilaanyo wuxuu maanta (shalay) Xafiiskiisa kulan xog-warran ah kula yeeshay Masuuliyiin sare oo ka socday Dallada Dhallinyarada JSL ee SONYO oo uu hoggaaminayey Guddoomiyaha Dallada Dhallinyarada JSL ee SONYO Mudane Siyaad Cumar Cali. Masuuliyiinta  Dhallinyarada SONYO ee Madaxweynaha booqashada ugu tagay waxa kale oo ka mid ahaa Mudane Cabdicasiis Siciid Saalax (Guddoomiyaha Guddida Joogtada ah ee Dallada SONYO) iyo Mudane Maxamed Caydiid Cali (Madaxa Waaxda Shaqo Abuurka ee Dallada SONYO).
 
Ujeedada ugu muhiimsan ee uu Madaxweyne Axmed Siilaanyo kulanka ula yeeshay Dallada Dhallinyarada SONYO waxay ahayd  si uu xog dhammaystiran uga helo wixii sannadkan 2015-ka Dallada SONYO u qabsoomay, wacyiga, waayaha iyo duruufaha haysta iyo qorshaha, hilaadda iyo hiigsiga ay Dhallinyaradu leeyihiin sannadka 2016-ka.
 
 
Ugu horrayn waxa hadalka bilaabay Guddoomiyaha Dallada Dhallinyarada SONYO Mudane Siyaad Cumar Cali oo Madaxweynaha uga mahad naqay kulanka xog-waraysiga ah ee uu ugu yeedhay Dhallinyarada. Guddoomiyaha Dallada SONYO wuxuu si mug iyo miisaanba leh ugu mahad naqay Madaxweynaha isagoo sheegay inuu kor u qaaday hanka iyo himilada Dhallinyarada JSL. Guddoomiyaha Dallada Dhallinyarada SONYO wuxuu tibaaxay in Xukuumadda Madaxweyne  Axmed Silaanyo ka hor ay ahayd ma dhacdo iyo arrin aan la hawaysan karin in la arko Dhalllinyaro da’yar oo Qaranka ka haya Xilal iyo masuuliyado sare. Sidaa darteed uu Madaxweyne Axmed Siilaanyo yahay ka Dhallinyarada ka furay  dabarkii ku xidhnaa ee ka horjoogay fursadaha horumarka iyo inay tallada dalka wax ku yeeshaan, taasina ay Dhallinyaradu Madaxweynaha ugu hayaan abaal fac weyn iyo mahad naq aan xad lahayn.
 
 
Dhinaca kale, Guddoomiyaha Dallada SONYO wuxuu si waafiya uga war bixiyey safarro hawleed ay ku kala bixiyeen dhammaanba Gobollada iyo Degmooyinka JSL si ay xog dhammaystiran iyo muuqaal cad uga helaan duruufaha iyo waayaha haysta Dhallinyarada JSL. Xogtii iyo macluumaadkii laga soo ururiyey safarradaa waxay Dallada SONYO ka diyaarisay qoraal dhammaystiran oo wata tallo-bixin si wax looga qabto caqabadaha Dhallinyarada ka haysta xagga horumarka iyo fursadaha nololeed.
 
 
Sidoo kale waxa isaguna kulankaa hadal ka soo jeediyey Mudane Cabdicasiis Siciid Saalax oo Madaxweynaha uga mahad naqay kulanka xog-waraysiga ah ee uu ugu yeedhay Dhallinyarada isagoo Madaxweynaha ku bogaadiyey guulaha ay Xukuumaddiisu ku tallaabsatay muddadii ay xilka haysay. Cabdicasiis Siciid Saalax waxa kale oo uu Madaxweynaha u sheegay in Xukuumaddiisu ay si dhab ah u fulisay ballan-qaadyadeedii ahaa in dhallinyaradu ay tallada dalka qeyb weyn ku yeeshaan, oo ay heer kasta oo maamulka dawliga ahba si mug leh uga muuqdaan. Cabdicasiis Siciid Saalax wuxuu tibaaxay in dhallinyarada JSL ay u soo dhabar-adaygeen duruufo nololeed oo aad u qallafsan, iyagoo marwalba muujinayey samir, dulqaad iyo dedaal ay kolba wixii noloshu baddo. Sidaa darteedna loo baahan yahay in si wada-jir ah looga shaqeeyo sidii loo horumarin lahaa Dhallinyarada JSL maadaama ay yihiin aayaha mustqabalka  ummaddeena.
 
Ugu dambayntii, masuuliyiinta Dallada Dhallinyarada SONYO waxay Madaxweynaha u soo gudbiyeen qoddobo dhawr ah oo uu nuxurkoodu ahaa sida soo socota:-
 

1. Iyadoo la tixgalinayo baahiyaha iyo duruufa dhabta ah ee haysta dhallinyarada JSL, in dib loo eego kaalmada ku jirta Sanduuqa Horuminta Somaliland (SDF) ee loo qoondeeyay Shaqo-abuurka Dhallinyaradda.
2. In dhallinyarada loo qoondeeyo (la siiyo) dhul ku habboon bar-kulanka dhallinyarada (Youth Multipurpose Resource Centers and Playgrounds)kuwaasoo ku yaala dhammaanba gobollada Dalka JSL isla markaana lagu wareejiyo Dallada SONYO si ay maal-gelin dhisme ugu raadiso.
3. Ku-dhawaaqista iyo meel-marinta “Maalinta Dhallinyaradda JSL 5-^ta Juun” taasoo noqon doonta Maalin dhallinyaradda Jam. Somaliland ay gaar u leeyihiin, laguna wacyigaliyo sidii ay dalkooda u hanan lahaayeen.
4. Meel-marinta Xeerka iyo Qaab-dhismeedka “Sanduuqa Dhallinyarada JSL” kaasoo uu Madaxweynuhu hore ugu dhawaaqay, loona baahan yahay in haatan la dar-dargeliyo oo la hirgaliyo.
5. Xoojinta iyo Joogteynta “Kulanka Isku-xidhka Arrimaha Dhallinyaradda” Youth Sector Coordination Forum” kaasoo ay Wasaaradda Dhallinyaraddu guddoomiso, Dallada SONYO-na kalkaaliso. In Madaxweynaha JSL furo shirka soo socda isla markaana uu amro xoojinta iyo joogteynta Shirkaas.

 
Ugu dambayntii, Madaxweynaha Jamhuuriyadda Somaliland Mudane Axmed Maxamed Siilaanyo oo si qoto dheer u dhegaysanayey masuuliyiintaDallada Dhallinyarada SONYO wuxuu uga mahad naqay xog-warrankii ay siiyeen.
 
Sidoo kale Madaxweynuhu wuxuu sheegay in ummad walba horumarkeeda ay saldhig u tahay kolba siday isugu hawlaan, u daryeelaan ee ay ugu dedaalaan horumarinta Da’yarta iyo Dhallinyarada. Kulankii wuxuu ku soo gaba-gaboobay hadallo dar-daaran iyo dhiirrigelinba ah oo uu Madaxweynuhu u soo jeediyey masuuliyiinta Dallada Dhallinyarada SONYO isagoo ku booriyey inay sida ugu habboon u gutaan waajibaadka ka saaran horumarinta iyo taageerada Da’yarta iyo Dhallinyarada maadaama ay iyagu yihiin mustaqbalkii iyo aayihii ummadda ee berrito.”