Ugu yaraan shan sarkaal oo booliis ah, ayaa ku geeriyooday qarax bam oo waddada dhinaceeda ka dhacay, bariga dalka Kenya, sida ay sheegeen booliiska iyo warbixino kale, xilli ciidamada Kenya ay kasoo baxayaan saldhigyo ku yaalla Soomaaliya.
Madaxa booliiska Kenya, Joseph Boinnet, ayaa xaqiijiyey inuu jiro qaraxa, oo dhacay salaasadii, hase yeeshee ma sheegin tirada khasaraaha.
Sarkaal sare oo booliis ah oo codsaday in aan la magacaabin ayaa sheegay in shan sarkaal lagu dilay qarax oo lala eegtay baabuur ay saaran yihiin ciidamada oo socda deegaanka Mpeketoni, oo u dhow xeebta Lamu.
Wargeyska Daily Nation ee Kenya, ayaa sidoo kale ku warramay in shan sarkaal la dilay, halka wargeyska the Standard uu dhimashada ku sheegay lix sarkaal, islamarkaana wargeyska the Star ayaa khasaaraha ku sheegay toddobo sarkaal.
Saraakiisha Kenya, ayaa badanaaba diida inay sheegaan khasaaraha kasoo gaadha weerarada Al-Shabaab.
Qaraxa cusub ayaa imanaya iyada oo ay Kenya u qabaneyso xus qaran askartii lagu dilay weerarkii Ceel-Cadde ee gobolka Gedo, halkaasi oo Shabaab ay ku weerareen saldhiggii ciidamada Kenya.
