Musharaxa madaxtinimada xisbiga jamhuuriga Donald Trump ayaa si fudud guul uga gaadhay gobolka maraykanka ee Nevada, taasi oo dhidibada u sii aasaysa tartanka uu hoggaanka ugu jiro ee magacaabista xisbiga.
Maal-qabeenka Donald Trump ayaa ku guuleystay gobolkan, isaga oo isku dayaya inuu noqdo musharaxa xisbiga Jamhuuriga u matalaya doorashada madaxtinimada dalka Mareykanka.
Trump ayaa guul weyn xalay ka gaadhay doorashadii ka dhacday gobolka galbeedka ku yaalla Nevada.
Natiijooyinkii ugu dambeeyey ee doorashada ayaa muujinaya in Trump uu helay 46% codadka, isaga oo si aad ah uga hormaray musharaxa kaalinta labaad galay ee Marco Rubio oo helay kaliya 24% codadka.
Senator-ka gobolka Texas, Ted Cruz ayaa kaalinta saddexaad ku galay 21% codadka.
Guusha Trump waa tii saddexaad oo xidhiidh ah, kadib markii uu horey ugu guuleystay doorashooyinkii ka dhacay gobollada New Hampshire iyo South Carolina, isaga oo sidoo kale kaalinta labaad ka galay doorashadii Iowa.
Guushan ayaa Trump siineysa dar-dar uu ku galo doorashada salaasada soo socota ka dhaceysa gobollo badan oo loo yaqaan Super Tuesday.
