Dadka Switzerland ee aftida dhiibanaya ayaa ku socda inay diidaan qorshe si toos ah loogu mustaafurinayo dadka shisheeyaha ah ee gala dembiyada yaryar, sidaasna waxa sheegaysa warbixinta hordhaca ah.
Qorshahan ayaa waxaa wata xisbiga garabka midig ee Swiss People’s Party.
Xisbiga ayaa sheegay in shacabka Switzerland ay aad uga walwalsan yihiin muhaajiriinta dalkooda ku soo badanaya iyo dhibaatooyinka la sheego in ay la yimaadaan.
Xisbiga ayaa doonaya in shisheeye kasta oo laba goor dembi yar gala muddo 10 sano gudahood ah, laga tarxiilo Switzerland isaga oo aan wax racfaan ah qaadan karin.
Dadka diidan qorshahan ayaa sheegaya inuu si aan cadaalad ahayn u beegsanayo afar meelood meel ka mid ah bulshada dalkaasi oo muhaajiriin ah, isla markaana uu kala soocayo cadaalada dalka.
Ugu dhawaan laba milyan oo heysta baasaabooro shisheeye ayaa u deggan si joogto ah ama sharci ah dalka Switzerland, haseyeeshee helista dhalashada Swisserland ayaa ah mid loo maro hab adag oo qarash badan , si toos ahna looguma helo xitaa qofka ku dhashaa, waxaana ka mid ah dadkan ajnebiga ah in badan oo aan weligood ku noolaan meel aan aheyn Switzerland.
Dawladda Swiss-ka ayaa sheegtey in boqolkiiba laba keliya shisheeyahaasi ku nool Switzerland loogu deeqay dhalashada Swiss citizenship.
In ka badan shan milyan oo qof ayaa u diiwaangashan in ay codkooda ka dhiibtaan aftida , waxaana codeyn kara oo keliya muwaadiniinta Swiss-ka.
