Burco (Dawan): Wasiirka Wasaaradda Macdanta iyo Tamarta Somaliland Eng. Xuseen Cabdi Ducaale, ayaa daah furay shir hawleed lagaga hadlayo dar-dar gelinta sahaminta iyo baadhista shiidaalka dalka si loo ogaado goobaha uu ku jiro shiidalku isla mrkaana loogu hawl geli lahaa sidii loola soo bixi lahaa.
Shirkan oo ay ka qayb galeen masuuliyiinta goboladda Togdheer, Oodwayne iyo Saraar iyo sidoo kale madax-dhaqameedka degaamadda Caynaba Oodwayne iyo Burco. Waxaana kulankaasi lagaga dooday baahidda loo qabo in wada jir looga wada qayb qaato sidii khayraadka dalka loo ogaan lahaa.
Wasiirka wasaaradda Macdanta iyo Tamarta oo furitaankii shirka khudbad ka jeediyay, ayaa faah faahin ka bixiyay hawlaha shiidaal baadhista ee loo baahan yahay iyo ujeedada sahaminta loo samaynayo oo ah tallaabada ugu horraysa ee lagu ogaan karo in shiidaalka dalka ku jirro iyo in kale.
Xuseen Cabdi Ducaale, oo arrimahaasi ka hadlayayna waxa uu yidhi “Waxaa loo baahan yahay in la fahmo Sahaminta shiidaalku waxay tahay iyo ujeedada aynu ka leenahay oo ah in aynu ogaano halka shiidaal inoogu jiro, taasoo u baahan sahamin rasmi ah oo aynu dalka ka samayno. Taasi oo aanu macnaheedu ahayn in aynu halka laga sahaminayo shiidaal ka soo saarayno imika, waxaad arkaysaa dad durba foostooyin iska diyaarsanaya oo leh imisaan halkaa ka helayaa laakiin sahamintu ma aha in aynu hadda shiidaal soo saaraysno. Laakiin waxaynu u baahanahay in aynu ogaano halka shiidaal inoogu jiro si aynu ula soo bixi karno marka aynu ogaano khayraadka dalka inoogu duugan”. Sidoo kale waxaa iyagna kulankaasi ka hadlay maayaradda magaalooyinka Burco, Oodwayne iyo Caynaba oo dhamaantood soo dhaweeyay sahaminta shiidaal baadhista isla markaana balan qaaday in ay degmooyin ahaan la shaqaynayaan sahamiyeyaasha Wasaaradda Macdantu soo diratay. Dhinaca kale Cuqaasha degmooyinka kor ku xusan ayaa balan qaaday in ay soo dhawaynayaan sahaminta shiidaal baadhista isla markaana tilmaamay in ay balan qaadayaan in aanay wax dhibaato ahi ka iman doonin degaamadda s ahaminta shiidaalka laga samaynayo.
Dawannews Hargeysa office
