Hargaysa (Dawan)- Guddoomiye Ku-xigeenkii Qaarada Yurub ee Xisbiga WADDANI, Khaalid Xasan Diiriye iyo Caasha Xuseen Maraykan oo ka mid ahayd xisbigaas, ayaa iska casilay xilkii iyo xubinimadii ay ka hayeen xisbigaas mucaaridka ah.
Khaalid Xasan Diiriye iyo Caasha Xuseen Maraykan oo shalay warbaahinta kula magaalada Hargaysa, ayaa sheegay in ay iska casileen xubinimadii guddida fulinta iyo golaha dhexe ee xisbiga WADDANI, waxaanay naqdiyeen kooxdii KULMIYE ee xisbiga WADDANI ku biiray kuwaas oo ay ku eedeeyeen in ay afduubeen xisbiga WADDANI.
“Waxaan caddaynayaa anigoo ahaa guddoomiye ku xigeenkii qaarada Yurub ee xisbiga WADDANI inaan gabi-ahaanba iska casilay xilkii iyo xubinimadii golaha dhexe ee xisbiga,sababo badan ayaan isku casilay muddo kooban ayaan dalka joogay nasiib darro, markii aan dalka imid waxaan la kulmay xisbigii WADDANI ee muddada dheer aan ku soo jirnay wuxuu u afduuban yahay koox xukuumadda ka soo cadhootay, waxaanay si cadhaysan u afduubeen guddoomiyihii xisbiga oo siyaasadda ay wataan noqotay Muuse Biixi aynu ridno, annagana way nala noqon wayday in shacabka Somaliland ka iibinno Muuse aynu ridno,siyaasadana waanu sii wadaynaa waxaannu ku biiri doonaa xisbiyada kale,”ayuu yidhi Guddoomiye Ku-xigeenkii Qaarada Yurub ee Xisbiga WADDANI, Khaalid Xasan Diiriye oo shalay shirjaraa’id ku qabtay Hargeysa.
Caasha Xuseen Maraykan, ayaa iyaduna sheegtay in ay ka baxday xisbiga WADDANI iskana casishay xubinimadii gudidii fulinta iyo golaha dhexe ee xisbigaas, waxaanay tidhi; “Waxaan caddaynayaa inaan ka baxay xisbiga WADDANI, iskana casilay guddidii fulinta golihii dhexe iyo xubinmadii xisbigaba. Waxaa xisbiyada loo sameeyay marka aad garan waydo xisbi in aad mid kale ku biirto Somaliland waa geed xisbiyaduna waa laamo ka baxay.”
Dawannews Hargeysa office