Hargaysa (Dawan)- Wasiirka Wasaaradda Qorshaynta Qaranka Jamhuuriyadda Somaliland, Maxamed Ibraahim Aadan (Qabyotire), ayaa ku amaanay hay’adda shaqaaalaha dawladda barnaamijyo horumarineed ay ku talaabasatay, kuwoo uu ka mid ah mashruuca tiro koobka shaqaalaha dawladda.
Wasiirku wuxuu tilmaamay in aanay marnaba hore u dhicin muddada ay Somaliland jirtay in tiro koob lagu sameeyo shaqaalaha dawladda, taasoo faa’iido weyn u leh guud ahaan dalka gaar ahaana in lagu xisaabtami karo dhaqaale ahaan marka la ogaado tirada iyo tayadda shaqaalaha dawladda.
Wasiirka qorshaynta oo shalay hadal ka jeediyay munasibad ay hay’adda shaqaalaha shan baabuur kagala wareegtay baanka adduunka. “Mashruucani wuxuu ka mid yahay mashaariicda farro ku tiriska ah ee midho-dhalka noqday, waanan ku raacsanahay guddoomiyaha hay’adda shaqaalaha in aan inta badan mashaariicda kale laga helin wax ummaddu u aydo. Waan uga mahadnaqayaa hay’adda shaqaalaha iyo maamulkeeda oo si wanaagsan uga midho-dhaliyay. Waxaa jira mashaariic faro badan oo baanka adduunku ina siiyay, masharuucani waa shan sannadood, wuxuuna bilaabmay bishan aanu ku jirno 3-deedii wuxuuna dhammaanayaa sannadka 2021-ka. Waxaanan filayaa wax badan in aan ka faa’iidi doono,”ayuu yidhi Mr. Qabyotire. Waxa kaloo uu intaas ku daray; “Aad iyo aad ayaanu u soo dhawaynaynaa in baabuurtaas la wareejiyay ay noqoto tallaabadii u horaysay ee la qaado ka faa’iidaysigan mashruuca oo ay noqoto mid dhaqan gal ah. waan soo dhawaynaynaa in shaqaalaha dawladu ay noqdaan madax taabasho, waayo muddo dhawr iyo labaatan sanadood ah ayaynu soo jirnay.Waxaana laga yaabaa in aanay mudadaasi weli mashruuca noocaasi ina soo marin, oo aanay hore u dhicin in la ogaado tiradda shaqaalaheenu intay tahay. Waayo waan ku xisaabtami karnaa markaynu og nahay tiradda shaqaalaheena iyo tayadoodda. Markaas ayaynu qaadi karnaa tallaabadda wanaagsan.”
Dawannews Hargeysa office