London (Dawan)- 48 saacadood ka dib markii si daahfuran oo nabdoon ay doorashadii saddexaad ee madaxtooyadu uga qabsoontay Jamhuuriyadda Somaliland, ayaa dimuqraadiyada ka jirta Somaliland lagu soo qaaday fadhi uu yeeshay Baarlamaanka Ingiriisku shalay.
Xildhibaan Zac Goldsmith, oo ka tirsan baarlamaanka UK, ayaa hadal uu ka jeediyay fadhigaas oo Wargeyska Dawan soo turjumay, wuxuu ku sheegay in doorashadii madaxtooyada Somaliland u dhacday si nabadgelyo ah oo xor ah. Iyadoo kulankaas ay goobjoog ka ahayd Ra’iisul-wasaaraha Ingiriiska Mrs. Theresa May.
Xildhibaankan oo laga soo doortay degaanka Richmond Park ee magaalada London, wuxuu dimuqraadiyada ka jirta Somaliland barbar dhigay xiisada ka taagan doorashadii Kenya iyo qalalaasaha waddanka Zimbabwe.
“Iyadoo aynu ka duulayno waxa ka taagan Zimbabwe iyo qaska ka dhashay doorashooyinka Kenya, sidaas awgeed Ra’iisul-wasaare, ma igu raacsan tahay inaynu xusno guusha weyn ee Somaliland ay ka gaadhay doorashadii ka dhacday oo komishanka doorashooyinku ay qabteen doorasho ay goobjoogayaashii caalamiga ahaa caddeeyeen inay ahayd mid u hirgashay si nabadgelyo ah, xor ah isla markaana si daahfuran oo adag loogu tartamay,”ayuu yidhi Mudane Zac Goldsmith.
Waxa kaloo uu u soo jeediyay dawladda Ingiriiska inay ay kala shaqeyso xukuumadda cusub ee Somaliland ololaha cidhibtirka gudniinka fircooniga ah ee ay dawladda UK doonayso inay wax kaga qabato halista gudniinka fircooniga ahi ku hayo adduunka oo dhan.
Dawladda Ingiriiska ayaa bixisay kharashka goobjoogayaasha caalamiga ah ee ka korjoogtaynayay doorashadii madaxtooyada, kuwaasi oo tiradoodu ahayd 60 khabiir oo ka kala socday 27 dal.
Sidoo kale waxa Ingiriisku ay Somaliland ka saacidaan taabogelinta hannaanka dimuqraadiyada Somaliland illaa sannadkii 2002-dii oo doorashadii u horreysay ay ka dhacday Jamhuuriyadda Somaliland.
Dawannews Hargeysa office