Khadar.M.Dhako.
Hargaysa(Dawan):-Fadhigii Golaha Wakiilada Somaliland ee shalay oo uu Shir guddoominayay Guddoomiyaha Golaha Wakiilada Baashe Maxamed Faarax ayay Mudanayaashu dood ka yeesheen ajandaha kalfadhiga 41aad.
Mudanayaasha Golaha Wakiilada ee doodaa ka qayb galay ayaa waxay ku doodeen in ajandaha lagu soo daro Qiimaynta xaalada dalka iyo xogogaal u noqoshada xaalada Dhaqaale ee dalku ku jiro.
Xildhibaan Cabdiqaadir Jaamac Xaamud ayaa ku dooday in loo baahanyahay ajandaha kalfadhiga in lagu soo daro qiimaynta xaalada dhaqaalaha ee dalka.waxaana uu yidhi“Ajandahani wuu koobanyahay Saddex qodob ayaanan ku soo dari lahaa xogogaal u noqoshada xaaladaha dalka iyo maamul daadejinta oo Wasaarada Arimaha gudaha loo yeedho.waxa muhiima oo jirta xaalada Dhaqaalaha ee dalku ku suganyahay in lagu soo daro Ajandaha waxa kalo oo iyaduna muhiima ah in ajandaha lagu soo daro Xeerka Isgaadhsiinta oo baahi badan loo qabo.”.
Xildhibaan Cabdiraxmaan Muuse Jaamac ayaa soo jeediyay in ajandaha lagu soo daro Warbixinta Shirguddoonka.waxaanu yidhi“Ajandaha waa in lagu soo diro warbixintii Shirguddoonka ta labaad xaalada dalka sidii loo qiimayn lahaa waa in lagu soo daro ajandaha,Wasiirka Arimaha Gudaha iyo Wasiirka Wasiirka Arimaha Dibedda waa in loo yeedho Xisaab xidhka Misaaniyadda 2018 waa in lagu soo darro ajandaha,”.
Xildhibaan Cabdiraxmaan Yusuf Cartan ayaa ku dooday in loo baahanyahay in ajandaha lagu soo daro Qiimaynta xaalada dalka.waxaana uu yidhi“Ajandaha waa in lagu soo daro qiimaynta xaalada dalka Golaha Wakiilada muddo labo bilood iyo badh ayuu kala maqnaa intii wax badan ayaa isbedalay dalka gudihiisa,waxaanan soo jeedinayaa in ajandaha lagu soo daro Xeerka Doorashooyinka waana in aynu ansixino xeerkaa oo aynu is dhaafino,”.