Khadar.M.Dhako.
Hargaysa(Dawan):-Agaasimaha Madaxtooyadda Somaliland Maxamed Cali Bile iyo Guddoomiyaha Gobolka Sanaag Maxamed Axmed Caalin Tiimbaro ayaa shalay dhagax dhigay xarunta Madaxtooyadda Gobolka Sanaag.
Munaasibad ballaadhan oo lagu dhagax dhigayay aqalka Madaxtooyada gobolka Sanaag oo laga binaynayo xarunta gobolka Sanaag ee Ceerigaabo,ayay ka qayb galeen masuuliyiin heer qaran,gobol iyo degmo ah,madaxdhaqameed iyo shirkadda dhismahaa fulinaysa.
Agaasimaha Madaxtooyada Somaliland Maxamed Cali Bile,Guddoomiyaha gobolka Sanaag Maxamed Axmed Caalin Tiimbaro iyo Maayerka degmada Ceerigaabo,ayaa si isku mid ah u sheegay in gobolka Sanaag uu ka bilaabmay horumarkii ay xukuumaddu ka fulinaysay isla markaana aqalka Madaxtooyada ee laga dhagax dhigayna uu yahay mid wax wayn u soo kordhin doona gobolka Sanaag.
Ugu horrayn Agaasimaha Madaxtooyada Somaliland Maxamed Cali Bile oo ka hadlayay muhiimadda uu aqalka Madaxtooyada Somaliland ee gobolka Sanaag ee laga dhagax dhigay Ceerigaabo in uu ka mid yahay horumarka xukuumaddu ka hirgalinayso gobolka oo bilaabmay,waxaanu yidhi. “Waxaan rejaynayaa in dhagaxaa ugu horreeyay ee Maanta (Shalay) aynu dhagax dhignay xarunta Madaxtooyadda Gobolka Sanaag inuu noqdo Horumarkii Gobolka Sanaag,waxaanan rejaynayaa in Horumar badani uu halkaa ka yimaado waxaana rejaynayaa in gurigaasi noqdo guri muunad u noqda Magaalada Ceerigaabo.”.
Guddoomiyaha Gobolka Sanaag Maxamed Axmed Caalin Tiimbaro,ayaa u mahad naqay muwaadin dawldda ugu deeqay dhulka laga dhisayo aqalka Madaxtooyada gobolka Sanaag,waxaanu intaa raaciyay in sidaa loo dhagax dhigay guriga madaxtooyada uu ku bilaabmay horumarka xukuumddu ka hirgelinyso gobolka Sanaag.
Guddoomiye Tiimbaro oo arrintaa ka hadlayaana waxaa uu yidhi “Maanta (shalay) waxa inoo bilaabmay Horumarkii oo is daba joog ah waana la helaa qof muwaadin ah oo isagu hantidiisa hura waana faro ku tiris waanan u mahadnaqayaa,waxaanan kula dardaarmaynaa guri tayo leh in ay dhisaan shirkada dhisaysa guriga Madaxtooyadda Gobolka Sanaag,”.
Maayarka Magaalada Ceerigaabo Ismaaciil Xaaji Nuur ayaa sheegay in uu noqon doono guri qiimo leh dhismaha cusub ee guriga Madaxtooyada ee gobolka Sanaag.waxaanu yidhi“Waxa aanu u mahadnaqaynaa Ibraahim Axmed Kuutiye oo dhulkan bixiyay dhulkan waa guri inoo magaca oo noqon doona gurigii Madaxyooyadda Gobolka Sanaag waxa aanu doonaynaa guri qiimo leh.”.