Shirkadda Boeing ee soo saarta diyaaraddaha ayaa markii ugu horeysay soo bandhigtay diyaarad kuwa dagaalka ah oo ay samaysay, iyada oo hore caan ugu ahayd diyaaraddaha shacabku isticmaalo in ay soo saarto.
Diyaaraddan ayaa shirkaddu ku wareejisay ciidamada Cirka ee Australia oo lagu magacaabo Royal Australian Air Force Loyal Wingman, iyada oo taliska ciidamada Cirka ee dalkaasi uga mahadceliyey shirkadda Boeing diyaaraddan ay soo gaadhsiisay ciidamada.
Warsaxaafadeed ay shirkadda Boeing soo saartay oo lagu daabacay wargeyska The Telegraphy oo uu qormadan kasoo xigtay wargeyska Dawan ayaa lagu sheegay in ay taariikh u tahay shirkadda Boeing , waxa ay sidoo kale tilmaameen in ay sharaf u tahay iyo arrin taariikhi ah wadamada Commonwealth-ka laysku yidhaahdo ama wadamada Barwaaqo Sooranka ,waxaanay shirkaddu sheegtay in ay diyaaraddan isticmaali doonaan ciidamada Sirdoonka ee wadanka Australia, gaar ahaana qaybta Ciidamada Cirka .
Diyaaraddan waxa fikirkeeda lahaa khubarro ka tirsan ciidamada Australia ee cirka , iyaga oo u gudbiyey wasaaradda Difaaca ee dalkaasi, waxaanay wasaaradda Difaacu sheegtay in ay maal gelin doonto diyaaraddan , iyada oo ku maalgelinaysa lacag dhan $40 Milyan oo Dollar,iyada oo diyaaraddan loo adeegsan doono laba muhiimadood oo ah in ay sirdoon ahaan ciidamada Cirku u isticmaalaan iyo in ay ilaaliso diyaaraddaha kale ee ciidamada xiliyada lagu jiro hawlgalada.
Ra’isal wasaaraha Kanada Scott Morrison oo isna ka hadlay diyaaraddan, waxaanu sheegay in ay qorshahan cusub ku kordhin doonaan lacag maalgelin ah oo ay shirkaddu diyaaraddo noocan oo kale ah ugu samayso ciidamada Cirka ee Australia , waxaanay diyaaraddani noqonaysaa mashruucii ugu horeeyey ee maalgelin ah ee shirkaddan Maraykanka ah ee Boeing ay ka qabato dibadda dalka Maraykanka.