Hargeysa (Dawan)- Wasiirka wasaaradda waxbarashada iyo sayniska Jamhuuriyadda Somaliland Axmed Maxamed Diiriye (Toorno) ayaa daahfuray kow iyo sodon dugsi oo laga hirgelin doono miisaaniyada dawladda.
Waxaana wasiirka ku wehelinayey agaasimaha guud, agaasimaha waaxda maamulka iyo agaasimaha waaxda hantida ee wasaaraddaasi, wasiirka wasaaradda waxbarashada iyo sayniska ee Somaliland oo ka hadlay daahfurkii dugsiyadaas ayaa sheegay in kow iyo sodonkaas dugsi laga hirgelin doono guud ahaan gobollada dalka, isla markaana ay qayb ka yihiin fidinta iyo ballaadhinta waxbarashada si loo daboolo baahiyaha dhanka waxbarashada ee dalka.
Wasiirka wasaaradda waxbarashada iyo sayniska Somaliland Axmed Maxamed Diiriye (Toorno) ayaa sheegay in ilaa todoba boqol oo deegaan oo dalka ahi ayna lahayn dugsiyadii waxbarashada, wuxuuna daboolka ka qaaday in ay u qorsheysan tahay wasaaradda waxbarashada in sannadka dambe ay hiergeliso laba boqol oo dusi waxbarasho, si kor loogu qaado waxbarashada, isaga oo u mahadnaqay madaxweynaha Jamhuuriyadda Somaliland Muuse Biixi Cabdi, mas’uuliyiinta wasaaradda maaliyadda, xisaabaadka qaranka, baanka dhexe iyo cidkasta oo gacan ka geysatay hirgelinta dugsiyadaas.
Wasiir Toorno isaga oo arrimahaasi ka hadlaya waxaa uu yidhi. “Kow iyo sodonka dhisme ee wasaaraddu miisaaniyadeeda ka dhistay mahad naqa koobaad ILLAAHEY ayaa iska leh, sidoo kale waxaa aanu u mahad celinayna cashuur bixiyayaashi bixiyay, lacagtaasi ee cashuurtaasi laga qaaday.
Sannadkan waxaa aanu isku dayayna laba boqol in aanu gaadhsiino, boqol iyo afartan iyo saddex meelood oo dugsi dhexe leh, islamarkaana aan dugsi sarre laheyn”
Geesta kale, agaasimaha guud ee wasaaradda waxbarashada iyo sayniska Axmed Abokor Maxamed, agaasimaha waaxda maamulka Maxamed Saleebaan iyo agaasimaha waaxda hantida Yuusuf Xuseen, oo halkaas ka hadlay ayaa sheegay in dhaqaalaha ku baxaya dugsiyadaas laga maalgelin doono miisaaniyada wasaaradda, taas oo ah cashuurtii muwaadiniyiintu bixiyeen dibna loogu celinayo si ay u helaan adeegyada ay uga baahn yihiin dawladda ee ay waxbarashadu ka mid tahay, waxayna u soo jeediyeen bulshada ku dhaqan deegaanada laga hirgelinayo dugsiyadaasi in ay ka faa’iideystaan oo ay keenaan ubadka u baahan waxbarashada.
Agaasime Axmed Abokor ayaa mid mid isu dul taagay magacyada dugsiyada laga maalgelinayo miisaaniyada waxbarashada Qaranka ee 2020-ka iyo 2021-ka. “Dugsiga Duruqsi, dugsiga Gar-adag, dugsiga Xargaga, dugsiga Bixin Dhalaax, dugsiga Mandheera, dugsiga Bali-cabane, dugsiga Ceel Canood, dugsiga Ismaaciil Yoonis, Aadan Abokor, dugsiga Shulke, dugsiga Biyo Shiinaha, dugsiga Baliga-cas, Sayla Bari, Higlaale, dugsiga Weerarta, dugsiga Ina Cunaaye, dugsiga Darbi Dawan, dugsiga Shumux Shumux, dugsiga Laflamooda, dugsiga Hunduli, dugsiga Goraya-cad, dugsiga Qarmaji, dhismaha laabka Salaxley, dhismaha Laabka Baligubadle, dugsiga Sarmaanyo, dugsiga Masalaha Gorod.”
