Hargeysa (Dawan):-Wasiirka Wasaarada Ganacsiga iyo dalxiiska Somaliland Maxamuud Xasan Sacad Saajin ayaa sheegay in dalka Somaliland ay ku yaallaan goobaha laga ticraaco taariikhdii Bini,aadamka.
Maxamuud Xasan Sacad Saajin ayaa tilmaamay in Wadankeenu qani ku yahay waxyaabo badan oo dalxiiska ku wanaagsan,
Maxamuud Xasan Saajin ayaa hadalkan ka jeediyay Munaasibad Shalay xadhiga uu kaga jaray dhismayaal laga hirgaliyay goob dalxiiseedka Laas-Geel.Waxaanu yidhi”Wax badan in laga qabto ayay u baahantahay Laasgeel waxna waan ka qabanay dayr iyo Guryo ayaanu ka dhisnay,muddooyinkii ugu dambeeyay waxa hawl wayn nala waday Dr.Muuse Jaamac waanan ka rejaynaynaa in hawlo kale uu nala qabto.waxa wadankeenu qani ku yahay waxyaabo faro badan,waxaana jira dhawr nooc oo dalxiiska soo jiita.waxaana ku yaalla Magaalooyin dumay oo taariikhdii Bini,aadamka laga tixraacayo oo wadankeena ku duugan ayaa jira,”.
Sidoo kale Wasiirka ayaa sheegay in Dalxiisku uu ka mid yahay waxyaabaha Umaduhu dakhliga ugu weyn ka helaan.Waxaanu yidhi”Waxaana Wadankeenu leeyahay xeebahaa dheer oo ah meelaha lagu dalxiiso,waxa kale oo aynu leenahay Jasiirado.waxaana Wadankeena la diwaangaliyay boqol iyo dhawr iyo lixdan goobood oo dalxiis,waxyaabaha Umaduhu dakhliga ugu weyn ka helaan waa dalxiiska muhiimadaas ayuu Dalxiisku leeyahay,”.